काठमाडौँ, वैशाख ३० गते । पेरिस ओलम्पिकका लागि दक्षिण एसियाली टेबलटेनिसको अन्तिम छनोट प्रतियोगिता सोमबारदेखि नेपालमा हुँदैछ । मोहनदास बासुकलाको प्रशिक्षकत्वमा नेपालका चार खेलाडी संयोग कपाली, श्यान्टु श्रेष्ठ, नबिता श्रेष्ठ र इभाना थापाले पेरिस ओलम्पिकका चयन हुन प्रतिस्पर्धा गर्दै हुनुहुन्छ ।
टेबलटनिस इतिहासमै पहिलो पटक नेपालमा हुन लागेको यो ओलम्पिकको छनोट राष्ट्रिय टेबलटेनिस प्रशिक्षण केन्द्र, लैनचौर कभर्ड हलमा जेठ २ गतेसम्म हुनेछ । ओलम्पिकको ३३ औँ संस्करणका लागि दक्षिण एसियाबाट टेबलटेनिसको अन्तिम छनोट नेपालमा हुन लागेको हो ।
नेपाललगायत बङ्गलादेश, माल्दिभ्स, पाकिस्तान र श्रीलङ्काको सहभागिता रहनेछ । यस प्रतियोगितामा भारतको उपस्थिति भने छैन । विश्व च्याम्पियन्सीपमा वरीयतामा परेपछि भारत सीधै ओलम्पिकमा खेल्न योग्य भइसकेको छ ।
यस प्रतियोगिताबाट एक पुरुष र एक महिला खेलाडीले सीधै ओलम्पिकको टिकट काट्नेछन् । अहिलेसम्म नेपालका लागि तेक्वान्दो खेलाडी सँगिना वैद्य र दीपक विष्टले मात्र छनोट चरण पार गरेर ओलम्पिक खेलेको विगत छ ।
प्रतियोगताका लागि एसियन टेबलटेनिस युनियनले लेबनानका फाडी कसिसलाई कम्पिटिसन मेनेजर, भारतका गणेशन नीलकण्ठ एयरलाई रेफ्री र नेपाला तेजेन्द्रसिंह महरालाई टुर्नामेन्ट डाइरेक्टर नियुक्त गरेको छ ।
एसियन टेबलटेनिस युनियनका रिजनल उपाध्यक्ष तथा साउथ एसियन टेबलटेनिस फेडरेसन्सका महासचिव शङ्कर गौतमले दक्षिण कोरियामा एसियन टेबलटेनिस युनियनसँगको कयौँ बैठकपछि यो प्रतियोगिता नेपाल ल्याउन सफल भएको बताउनुभयो । उहाँले यस प्रतियोगिताका लागि एसियन टेबलटेनिस युनियनले २५०० अमेरिकी डलर सहयोग गरेको जानकारी पनि दिनुभयो ।
यसबिच ओलम्पिकमा चयन हुने नेपाली टेबलटेनिस खेलाडीलाई प्रायोजकमध्ये एक समाजसेवी सुमन खड्गीले जनही एक लाख र रेड टाइल्सका प्रोप्राइटर सुरज केसीले ५० हजार रुपियाँ प्रदान गर्ने घोषणा गर्नुभएको छ ।
-original-thumb.jpg)
