दुई किलो चाँदीसहित चन्द्रगढी विमानस्थलबाट भारतीय नागरिक पक्राउ

विष्णुप्रसाद पोखरेल
दमक, वैशाख २९ गते । झापाको भद्रपुरस्थित चन्द्रगढी विमानस्थलबाट प्रहरीले अढाई किलोग्राम चाँदीसहित एक जना भारतीय नागरिकलाई पक्राउ गरेको छ । 

शुक्रबार साँझ ६ बजेको समयमा बुद्ध एयरको विमानबाट काठमाडौँ जान लाग्नुभएको भारत उत्तराखण्ड देराजुङका ३० वर्षीया तेन्जिङ छिरिङलाई अवैध रूपमा बोकेको चाँदीसहित पक्राउ गरिएको जिल्ला प्रहरी कार्यालय झापाले जनाएको छ ।

जिल्ला प्रहरी कार्यालय झापाका प्रवक्ता कृष्णकुमार चन्दका अनुसार विमानस्थलमा खटिएको प्रहरी टोलीले छिरिङको झोला चेकजाँच गर्दा लुकाइछिपाई राखेको अवस्थामा दुई किलो पाँच ग्राम चाँदी र २८ हजार पाँच सय भारतीय रुपियाँ बरामद गरेको हो ।

पक्राउ परेकी छिरिङलाई जिल्ला प्रहरी कार्यालयको हिरासतमा राखेर आवश्यक अनुसन्धान सुरु गरिएको चन्दले जानकारी दिनुभयो ।