मुलुकको समृद्धिका लागि राजनीतिक स्थिरता आवश्यक : महासचिव पोखरेल

काठमाडौँ, वैशाख २२ गते । नेपाल कम्युनिष्ट पार्टी (एमाले)का महासचिव शङ्कर पोखरेलले मुलुकको समृद्धिका लागि दूरदर्शी नेतृत्व, बलियो राजनीतिक दल र राजनीतिक स्थिरता आवश्यक रहेको बताउनुभयो । 

एमाले काठमाडौँ-प्युठान सम्पर्क मञ्चको १२ औँ अधिवेशन उद्घाटन गर्नुहुँदै महासचिव पोख्रेलले दूरदर्शी नेतृत्व, बलियो राजनीतिक दल र राजनीतिक स्थिरता सुनिश्चित हुन सके मुलुकको समृद्धिलाई कसैले रोक्न नसक्ने बताउनुभएको हो । उहाँले हालै सम्पन्न उपनिर्वाचनले मुलुकमा अस्थिरता सिर्जना गर्न खोज्ने शक्ति र प्रवृत्ति काम लाग्दैन भन्ने सन्देश दिएको बताउनुभयो । विकसित देशमा राजनीतिक स्थायित्व पुराना राजनीतिक दलबाट खोज्ने गरिएको उहाँको भनाइ छ । 

“अमेरिकामा सयौँ वर्षदेखिका तीनै पार्टीबाटै नेतृत्वको विकल्प खोज्ने गरिन्छ । त्यहाँ ती पार्टी पुराना भयो, जनताले नयाँ पार्टी चाहियो भनेर भन्दैनन् । ब्रिटेनमा पनि सयौँ वर्षदेखि पुराना पार्टी आपसमा प्रतिस्पर्धा गर्छन्,” उहाँले भन्नुभयो, “तर नेपालमा सामाजिक सञ्जालमा चर्चित व्यक्तिलाई अगाडि सारेर पपुलिजमका आधारमा विचारधारा निर्माण गर्ने र पुराना पार्टीको विकल्प खोज्ने दुष्प्रयत्न गरिएको छ । त्यसले नेपाली समाजलाई दिग्भ्रमित गरिरहेको थियो, त्यो सच्चा के हो भन्ने कुरा जनताका बिचमा गएर उपनिर्वाचनले परीक्षण गरेको छ ।” 

उहाँले एमालेलाई मुलुकको समृद्धि र विकासको अगुवा पार्टीका रूपमा अगाडि बढाउन आवश्यक रहेको बताउनुभयो । अहिले नयाँ समीकरणले देशलाई चमत्कार गर्छ भन्ने विश्वास आफूहरूको नभएको भन्दै मुलुकको ओरोलो यात्रालाई रोक्न र मुलुकलाई बरबाद हुनुबाट जोगाउन पार्टी सरकारमा सहभागी भएको उहाँले स्पष्ट पार्नुभयो । अहिले पनि एमालेको ध्यान मिसन २०८४ तर्फ रहेको र पार्टीलाई बलियो राष्ट्रिय शक्तिका रूपमा स्थापित गर्नुपर्ने धारणा उहाँले राख्नुभयो । 

एमाले पोलिटब्युरो सदस्य तथा सांसद सूर्य थापाले प्युठानका विकास निर्माणले गति लिएको बताउनुभयो । कार्यक्रममा एमाले प्युठानका अध्यक्ष विजयविराट विष्ट, अनेरास्ववियुका उपाध्यक्ष धर्म गिरीलगायतले प्युठानको विकासमा सबै एकजुट हुनुपर्ने धारणा राख्नुभयो । रासस