नागेन्द्रकुमार कर्ण
महोत्तरी, वैैशाख ११ गते । प्रथम मटिहानी मेयर कप फुटबल प्रतियोगिताको उपाधि जलेश्वर फुटबल क्लबले उचालेको छ । मटिहानी नगरपालिकास्थित मटिहानी रङ्गशालामा सोमबार अबेर सम्पन्न फाइनल खेलमा जलेश्वरले एभरेष्ट एकेडेमी फुटबल क्लब सर्लाहीलाई पेनाल्टीमा ४–१ गोलले हरायो ।
निर्धारित समयमा गोलरहित बराबरीमा सकिएको खेल पेनाल्टीमा पुगेर सकिएको थियो । उपाधिसँगै जलेश्वरले ५० हजार र उपविजेता एभरेष्टले २५ हजार रुपियाँ पुरस्कार पायो । प्रतियोगिताको उत्कृष्ट खेलाडीको पुरस्कार जलेश्वरमा सञ्जीव कार्की,
उत्कृष्ट गोलरक्षक जलेश्वरका जयराम चौधरी, उत्कृष्ट मिडफिल्डर एभरेष्टका सुमन योन्जन, उत्कृष्ट स्ट्राइकरको पुरस्कार एभरेष्टका समीर राईलाई प्रदान गरियो । विजेतालाई मटिहानी नगरपालिकाका नगर प्रमुख हरिप्रसाद मण्डल, महोत्तरीका प्रमुख जिल्ला अधिकारी शिवराम गेलाल लगायतले पुरस्कार वितरण गर्नुभयो ।
