सोहोरेर सारा फूलका रङहरू
झारेर सारा ताराका आभाहरू
र ओरालेर आकाशबाट इन्द्रेणी
तिम्रै मुहारमा राखिदिउँ कि !
अनि भनुँ प्रिय,
हेर तिम्रो तस्बीर मेरो आँखामा
जहाँ तिम्रा सपना
र मेरो बिपना एकसाथ
दोहरी पिङ खेलिरहेछन् निस्फिक्री
जहाँ तिम्रो बैँसालु चाहना र
मेरो प्रेमिल भावना एकसाथ
छलाङ मारिरहेछन् निर्धक्क ।
यतिबेला
गुराँसे वनमा मुस्काएको लालिगुराँसझैँ
राताम्य भएका छन् तिम्रो गाला पनि
बिहानी हिमाल हाँसेजस्तै
प्रफुल्ल उध्रेका छन् तिम्रा ओंठ पनि
साँच्चै भन्नुपर्दा
मलाई भुतुक्क पार्ने
तिम्रा ती चञ्चल नयन
र तिम्रा ती मधुर मुस्कान हुन्
जसलाई मैले भन्ने गरेको छु
तिम्रो र मेरो
पिरतीको रङ त्यही हो
पिरतीको आभा त्यही हो ।
