काठमाडौँ, जेठ ३० गते । निर्माणको तयारीमा रहेको चलचित्र ‘बाघचाल’ ले मुख्य अभिनेतृको खोजी गरिरहेको छ । चलचित्र निर्देशक सम्राट् बस्नेतले डिजिटल अडिसनमार्फत उपयुक्त अभिनेतृको खोजी गरिरहेको बताउनुभएको छ । अडिसनमा सहभागी हुन चाहनेले फोटो र दुई मिनेटको आफ्नो प्रस्तुतिसहितको भिडियो आगामी असार ७ गतेसम्म पठाउनुपर्ने निर्देशक बस्नेतले जनाउनुभएको छ ।
यसअघि सामाजिक सञ्जालमार्फत सूचना निकाल्दै चलचित्रका लागि चाहिने सात कलाकारका लागि अडिसन आह्वान गरेको थियो । शनिबार र आइतबार राजधानीमा भएको अडिसनमा १५१ जना सहभागी थिए । छनोट भएका कलाकारको नाम आगामी असार १० गते सार्वजनिक गरिने निर्माण पक्षले जनाएको छ ।
उत्तरगया म्युजिक एन्ड फिल्म्स तथा सबिन फिल्म्सको ब्यानरमा बन्ने राजीव गुरुङ (दीपक मनाङे) को प्रस्तुतिमा निर्माण हुने चलचित्रमा कलाकारका रूपमा सांसद राजीव गुरुङ (दीपक मनाङे), सबिन श्रेष्ठ यसअघि नै अन्तिम छनोटमा परिसक्नुभएको छ । फिल्मको निर्मातामा धनबहादुर गुरुङ (डिबी), टीकाराम भण्डारी, समीर शाही र कृष्ण थापा हुनुहुन्छ । चलचित्रमा अभिनेता सबिन श्रेष्ठ कार्यकारी निर्माता हुनुहुन्छ ।
