काठमाडौँ, जेठ २२ गते । संयुक्त राष्ट्रसङ्घको मूल नारालाई स्थानीयकरण गर्दै नेपालमा यस वर्ष ‘प्लाष्टिकजन्य प्रदूषण निर्मूल पारौँ, वातावरणमैत्री विकल्पको उपयोग गरौँ’ भन्ने नाराका साथ वातावरण दिवस मनाइँदैछ । संयुक्त राष्ट्रसङ्घको महासभाले गरेको घोषणा तथा संयुक्त राष्ट्रसङ्घीय वातावरण कार्यक्रमको अग्रसरतामा सन् १९७३ देखि प्रत्येक वर्ष जुन ५ का दिन विश्वभर विश्व वातावरण दिवस मनाइन्छ ।
नेपालले पनि प्रत्येक वर्ष यस दिनमा विश्व वातावरण दिवस मनाउने गरेको छ । वन तथा वातावरण मन्त्रालयअन्तर्गतको वातावरण विभागले यस अवसरमा वातावरण संरक्षण र प्रवर्द्धनसम्बन्धी विविध कार्यक्रम गर्दै आ–आफ्नो स्थानबाट यस दिवस भव्य र सभ्यरुपमा मनाउनका लागि सबै स्थानीय तह, प्रदेश सरकार, सङ्घीय सरकार एवं सरकारी तथा गैरसरकारी निकाय, सम्बन्धित सरोकारवाला र आमसर्वसाधारणमा अनुरोध गरेको छ ।
यसैबीच, काठमाडौँको तारकेश्वर नगरपालिकामा नेपालटारमा रहेको एन.आर. कलेजको वातावरण उपसमितिले ‘वातावरण संरक्षण गरौँ’ भन्ने नाराका साथ सफाइ अभियान तथा जनचेतनामूलक र्याली निकालेको छ ।
शिक्षक, विद्यार्थी सहभागी रहेको कार्यक्रममा कलेज क्षेत्रको सरसफाइ गरिएको जानकारी क्याम्पस प्रमुख राजीप धितालले दिनुभयो । यसैगरी सिर्जनशील महिला समूहले पनि जनचेतनामूलक र्याली निकालेको छ ।
-square-thumb.jpg)
