थाहा छैन मलाई
आफूभित्र कसको शत्रु पाल्दै छु !
फोहोर फाल्दै छु
कि
आफैँलाई खाडलमा हाल्दै छु !
प्लास्टिक निलेर
मरिरहेछन् सामुद्रिक जीवहरू
म
सहरभरिको फोहोर
बढारेर नदीमा फाल्दै छु ।
जहाँ सडकका गाईलाई
प्लास्टिकको घाँस हालिन्छ ।
हिउँदमा
कृषकले खेतबाट कालो धुवाँ फैलाउँदा
म पनि जाडो थेग्न
प्लास्टिक बटुलेर घुर बाल्दै छु ।
मेरो अत्याचार
पानीको बोत्तलले बेस्सरी भोगिरहेको छ
प्लास्टिक भन्दै
उसको इज्जतलाई म निरन्तर गाल्दै छु ।
मिल्केका छन्
उपयोगी भोर्ला र सुपारीका पातहरू
म
प्लास्टिक भित्र्याउन
दुर्लभ विदेशी मुद्रा फाल्दै छु ।
यसरी थाहै नपाई
म आफूलाई
आफ्नै स्वार्थको चितामा बाल्दै छु ।
यसरी थाहै नपाई
म आफूलाई
आफैँले खनेको खाडलमा हाल्दै छु ।
-original-thumb.jpg)
-original-thumb.jpg)
