डोल्पा, चैत १५ गते । नेपाली समाजमा महिलामाथि हुने थिचोमिचो र हिंसाको कथावस्तुलाई समेटेर बनाइएको ‘वैरागी’ नामक म्युजिक भिडियोको पहिलो पटक डोल्पामा प्रिमियर सो गरिएको छ । त्रिपुरासुन्दरी नगरपालिका–९ चुँ गाउँमा छायाङ्कन तथा एचबीआर कला केन्द्रको ब्यानरमा निर्माण गरिएको उक्त भिडियोको त्रिपुरासुन्दरी नगरपालिकाको नगर केन्द्र त्रिपुराकोटमा पहिलो प्रिमियर सो गरिएको हो ।
ग्रामीण क्षेत्रका महिलाले भोग्दै आएका विषयवस्तुलाई म्युजिक भिडियोका माध्यमबाट समाजमा सचेतना फैलाउने हिसाबले तयार पारिएको वैरागीमा सुरबिना कार्की, वसन्त सार्की, एन्जिला पन्थीलगायतका कलाकारको अभिनय रहेको छ ।नगरपालिकाका प्रमुख जनचन्द्र रोकायाले डोल्पाली समाजलाई मात्र नभएर सिङ्गो नेपाली समाजमा भएको महिला हिंसालाई भिडियो म्युजिकले उजागर गरेकोमा निर्माण पक्षको प्रशंसा गर्नुभयो । लक्ष्मण सुनारको निर्देशन रहेको वैरागी म्युजिक भिडियोको निर्माण हरि पन्थीले गर्नुभएको हो ।
