काठमाडौं, चैत १४ गते । नेपाल बङ्गलादेशमा जारी साफ यू-१७ महिला च्याम्पियनसिप फुटबल प्रतियोगिताको चौथो तथा अन्तिम खेलमा आयोजक बङ्गलादेशसँग बराबरीमा रोकिएको छ ।
ढाकामा मंगलबार भएको खेलमा नेपाल बङ्गलादेशसँग १-१ गोलको बराबरीमा रोकिएको हो । नेपालले सुरुवाती अग्रता लिएपनि जोगाउन नसक्दा बराबरीमा चित्त बुझाएको हो ।
नेपालका लागि आठौँ मिनेटमा सेनु परियारले गोल गर्नुभएको थियो । बङ्गलादेशकी सागोरिकाले ७५औँ मिनेटमा बराबरी गोल गर्नुभएको हो । यससँगै नेपालले चार खेलबाट चार अङ्क बनाएको छ ।
नेपाल यसअघिनै प्रतियोगिताबाट बाहिरिएको थियो । नेपाल पहिलो खेलमा भारतसँग ४-१ गोलले पराजित भएको थियो । नेपालले दोस्रो खेलमा भुटानलाई ५-० गोलले हराएको थियो ।
तेस्रो खेलमा भने नेपाल रुससँग ३-० गोलले पराजित भएको थियो । रुस पाहुना टोलीको रूपमा च्याम्पियनसिपमा सहभागी भएको हो ।
