काठमाडौं, फागुन २६ गते । नवप्रवेशी क्लब चर्च ब्वाइज युनाईटेड शहिद स्मारक ‘ए’ डिभिजन लिगमा लयमा देखिएको छ । दशरथ रंगशालामा शुक्रबार साँझ भएको खेलमा चर्च ब्वाइजले हिमालयन शेर्पा क्लबलाई १–० गोलले हरायो ।
लिगका चर्च ब्वाइजको यो लगातार तेस्रो जित हो । चर्च ब्वाइजको जितमा आशिष चौधरीले गोल गर्नुभयो । आशिषले २०औं मिनेटमा गरेको गोल टोलीको जितमा निर्णायक बन्यो । खेलमा शेर्पाले गोलको राम्रा अवसर बनाएपनि सदुपयोग गर्न सकेन ।
जितसँगै शीर्षस्थानमा रहेको चर्च ब्वाइजले तीन खेलबाट ९ अंक बनाएको छ । लिगमा पहिलो हार खेपेको शेर्पाको तीन खेलबाट चार अंक छ ।
