यी आँखाका तारा हुन्छन् मनमा बस्नेहरू
जिउने एक सहारा हुन्छन् मनमा बस्नेहरू
भेटवार्ता नभए’नि साथमा सँगै नरहे’नि
सधैँ उस्तै प्यारा हुन्छन् मनमा बस्नेहरू ।
सोच्दै नसोचीकन जिन्दगीमा गल्ती गरिन्छ
केही जानीजानी त केही नादानीमा गल्ती गरिन्छ
जसले रत्तिभर महत्त्व दिँदैन आफ्नो जीवनमा !
उसैलाई राखेर यी आँखाका नानीमा गल्ती गरिन्छ ।
नतिजा जे जस्तो आवस् त्यसको चिन्ता छोड
जता दुनो सोझो हुन्छ उतै पाइला मोड
बाहिर त स्वाभिमानको भाषण दिए भैगयो नि
भित्र भित्र चाकडीकै बलियो साइनो जोड ।
