अर्को चुनावमा उम्मेदवार हुँदैन : नेता कोइराला

मीना कंडेल

कावासोती, मंसिर १ गते । नेपाली कांग्रेसका पूर्व महामन्त्री डा. शशांक कोइरालाले यस पटकको निर्वाचन जितेपछि अर्को पटक उम्मेदवार नबन्ने बताउनुभएको छ । बिहीबार देवचुलीमा भएको कोणसभालाई सम्बोधन गर्दै उहाँले सो कुरा बताउनुभएको हो ।

“यस पटक जितेपछि अर्को पटक कुनै क्षेत्रबाट उम्मेदवारी दिँदैन” नेता कोइरालाले भन्नुभयो, “यस पटक जितेपछि पाँच वर्षसम्म नवलपुरको विकासका लागि मिहिनेत गर्नेछु ।” चुनाव जितेपछि ठूला योजना ल्याएर आफ्नो निर्वाचन क्षेत्रका विकास गर्ने बताउनुहुँदै नेता कोइरालाले खरबौँ रुपियाँको योजना ल्याउने प्रतिबद्धता जनाउनुभयो ।

उहाँले कृषिउपजको उत्पादनलाई वृद्धि गर्न र बजारीकरणका लागि विशेष योजना बनाएको भन्दै विगतका आफ्ना अधुरा योजनालाई अब निर्वाचनपछि पूरा गर्ने प्रतिबद्धता जनाउनुभयो ।