विष्णुप्रसाद पोखरेल
दमक, कात्तिक २४ गते । नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले दिगो विकास लक्ष्य हासिल गर्न सहकारी क्षेत्रको महत्वपूर्ण भूमिका हुने बताउनुभएको छ । उहाँले ग्रामीण क्षेत्रको विकासमा सहकारीको भूमिका अतुलनीय हुने भन्दै यसतर्फ ध्यान केन्द्रित गर्न सहकारीकर्मीलाई आग्रह पनि गर्नुभएको छ ।
झापा निर्वाचन क्षेत्र नं. ५ का सहकारीकर्मी तथा सहकारी अगुवासँग दमकमा भएको अन्तक्र्रियामा उहाँले सहकारी क्षेत्रलाई विशेष रूपमा ग्राह्यता दिएर अगाडि बढ्न सुझाव दिनुभयो । यो उहाँको निर्वाचन क्षेत्र हो ।
“अर्थतन्त्रको तीनखम्बे नीतिमा सहकारी समेटिएको भए पनि अझ विस्तृत रूपमा यसलाई परिभाषित गरेर अगाडि बढ्न आवश्यक छ,” उहाँले भन्नुभयो ।
सहकारीको सेवा गाउँमा केन्द्रित गरेर आर्थिक गतिविधिलाई ग्रामीण क्षेत्रसम्म पु-याउन सहकारी संस्थाले निर्वाह गरेको भूमिकालाई आत्मसात् गर्न उहाँले आग्रह गर्नुभयो ।
सन् २०३० भित्र दिगो विकास एजेन्डाका १७ वटा लक्ष्य र १६९ वटा सहायक लक्ष्य प्राप्त गरेर मुलुक विकाशशील राष्ट्र बनाउनुपर्ने दायित्व रहेको भन्दै यसमा सहकारी संस्थाले अगुवाइ गर्नुपर्नेमा ओलीले जोड दिनुभयो । धेरै महिला सहकारी संस्थामार्फत आर्थिक उपार्जनमा जोडिएको भन्दै ओलीले यसलाई अझ सशक्त बनाउन सुझाव दिनुभयो ।ओली मङ्गलबार आफ्नो गृह जिल्ला झापा आउनुभएको हो ।
