मन्त्री चौधरीद्वारा दाङ क्षेत्र नं १ मा मनोनयन दर्ता

दिवाकर पोख्रेल

देउखुरी, असोज २३ गते । सहरी विकासमन्त्री मेटमणि चौधरीले सत्ता गठबन्धनको साझा उम्मेदवारको रुपमा दाङ क्षेत्र १ मा प्रतिनिधि सभा सदस्य निर्वाचनका लागि मनोनयन दर्ता गाउनुभएको छ  ।

गठबन्धनबाट प्रतिनिधि सभा सदस्यमा एकीकृत समाजवादीका नेता चौधरीले मनोनयन दर्ता गराउनुभयो । प्रदेश सभातर्फ (क) मा नेकपा (माओवादी केन्द्र) का इन्द्रजित थारु र (ख) मा नेपाली कांग्रेसबाट अनुराग खड्काले मनोनयन दर्ता गराउनुभएको छ । 

काठमाडौंमा रहनुभएका खड्का मौसम खराबीका कारण काठमाडौँस्थित निर्वाचन आयोगको कार्यालयमा पुगेर मनोनयन दर्ता गराउनुभएको हो । खड्का नेपाली काङ्गेसका  नेता स्वर्गीय खुमबहादुर खड्काका पुत्र हुनुहुन्छ । 

यसैबीच नेकपा (एमाले) की नेत्री गङ्गा थारुले स्वतन्त्र रुपमा उम्मेदवारी दर्ता गराउनुभएको छ । नेकपा एमालेबाट टिकट नपाएपछि थारुले स्वतन्त्र उम्मेदवारी दर्ता गराउनुभएको हो । दाङ क्षेत्र नं १ मा एमालेले शान्ता चौधरीलाई टिकट दिएको छ ।