मान्नोस् विचारको सौन्दर्य बलेको छैन अझै
आस्था ब्यूँझाउने जाँगर फलेको छैन अझै
कुँजिएका छैनन् पाइला यात्रा चलिरहेको छ
हिँड्नु साँच्चै पर्छ अठोटमा गलेको छैन अझै ।
स्वार्थको पोखरीमा पौडेर भित्रभित्रै हराइरहेछन्
आफ्नाका बालिनाली आफैँ बसेर चराइरहेछन्
सक्नुपर्छ हो हेर्न धेरै थोक देख्न पाइँदो रहेछ
मानुको गुन तिर्न अहिले झण्डा फह्राइरहेछन् ।
आफूलाई भुल्छन् ढुक्कै परचक्री चिन्छन् तर
विश्वास बेचेरै पनि सुन्दर तस्बिर किन्छन् तर
बराजुकै पालोदेखि धानिरहेछन् नि यो परम्परा
जाँगर जोश बग्दै जान्छ अभिमान लिन्छन् तर ।
इमान जमान दुला पसे बेइमानले डाली पायो
स्वार्थी दम्भी अघि बढे इमानदारले गाली पायो
अन्धकार र कुरूपता जताततै पाइन्छन् अचेल
व्यभिचारका ठेकेदारले सुन्दरशान्त ताली पायो ।
