गोरखापत्र अनलाइन
काठमाडौं, साउन २१ गते । थारु समुदायको सौन्दर्य प्रतियोगिता ‘मिस्टर एण्ड मिस थारु–२०२२’ हुने भएको छ । थारु समुदायको बाक्लो बस्ती रहेको देशका मुख्य शहरमा साउन २१ गतेदेखि अडिसन सुरु हुने आयोजनाका प्रमुख कार्यकारी अधिकृत सुरेशकुमार चौधरीले बताउनुभयो ।
उहाँका अनुसार विश्वव्यापी रुपमा फैलिएको कोरोनाका कारण यसअघि प्रतियोगिताले निरन्तरता पाएन । यो वर्ष प्रतियोगितालाई निरन्तरता दिन लागिएको उहाँको भनाइ छ ।
गत वर्षदेखि थारु सौन्दर्य प्रतियोगिताले निरन्तरता पाएको छ । निरन्तरता दिने क्रममा चौथो संस्करणको रुपमा आउँदो भदौ महिनामा ग्राण्ड फिनाले आयोजना गर्ने आयोजकले जनाएको छ ।
आयोजकले एक महिना अघिदेखि नै आवेदन खुला गरिसकिएको जनाएको छ । अडिसनको अघिल्लो दिनसम्म सहभागीले आवेदन दिन सक्ने व्यवस्था मिलाइएको छ । प्रतियोगितामा सहभागी हुन चाहने युवायुवतीले आधिकारिक वेबसाइट रजिष्ट्रेशन डट कम जहइन्टरटेनमेन्ट डट कममा गएर आवेदन दिन सकिने अयोजकले जनाएको छ ।
खल्ती एप मार्फत् पनि आवेदन दिन सकिने आयोजको भनाइ छ । खल्ती एपबाट आवेदन दिंदा १० प्रतिशत छुटको व्यवस्था छ भने आवेदन शुल्क ६०० रुपियाँ तोकिएको आयोजकले जनाएको छ ।
साउन २१ गते शनिबार सुनसरीको झुम्का, पर्साको वीरगञ्ज, चितवनको भरतपुर र बाँकेको नेपालगञ्जमा अडिसन गर्ने आयोजकको कार्यतालिका छ । साउन २४ गते मंगलबार मोरङको विराटनगर, सिराहाको लाहान र कैलालीको टीकापुरमा र साउन २८ गते शनिबार काठमाडौं, दाङ र बुटवलमा अडिसन हुने अायोजकले जनाएको छ ।
अडिसनबाट छनोट भएकालाई भदौमा अभिमुखीकरणमा सहभागी गराइने बताइएको छ । त्यसलगत्तै प्रतियोगिताको ग्राण्ड फिनाले हुने र प्रतियोगिताका प्रथम बिजेताले ५० हजार नगद, दोस्रो हुनेलाई ३० हजार र तेस्रो हुनेलाई २० हजार रुपियाँ नगद र अन्य उपहार प्रदान गर्ने कार्यकारी अधिकृत चौधरीले बताउनुभयो ।
प्रतियोगिता सन् २०१७ देखि सुरु गरिएको हो । पहिलो संस्करणको मिस्टर थारु चन्दन चौधरी र मिस थारु जेनिशा चौधरी हुनुभएको थियो । २०१८ को मिस्टर थारु रविन चौधरी र मिस थारु आकृति चौधरी हुनुभएको थियो । त्यस्तै, २०२१ मा भएको तेसो संस्करणको मिस्टर थारु प्रशान्त हुजदार र मिस थारु लिमा थारुले उपाधि जित्नुभएको थियो ।
