काठमाडौं, साउन ११ गते । संयुक्त राष्ट्र सङ्घ शान्ति मिसन अन्तर्गत कङ्गो मिसनको फोर्स हेडक्वार्टर रहेको गोमा शहरमा साउन ९ गतेदेखि स्थानीय जनताले विभिन्न माग राख्दै आन्दोलन गरेका छन् ।
स्थानीयले मिसनविरुद्ध प्रदर्शन गर्नुका साथै मिसनसँग सम्बन्धित केही भौतिक संरचनामा आगजनी तथा लुटपाटजन्य घटना समेत गरिरहेका छन् । उक्त मिसनमा तैनाथ नेपालका सैनिक तथा पर्यवेक्षक सुरक्षित रहेको नेपाली सेनाले बुधबार जारी गरेको प्रेस विज्ञप्तिमा उल्लेख छ ।
सेनाले उक्त मिसनमा तैनाथ नेपाली सेनाका सम्पूर्ण युनिटहरु तथा सैनिक पर्यवेक्षकलाई विशेष सुरक्षा सतर्कता अवलम्बन गर्न, परिस्थितिको निरन्तर अनुगमन गर्न र शान्ति कार्य निर्देशनालयसँग निरन्तर सम्पर्कमा रहन निर्देशन पनि दिएको छ ।
