सिराज खान
नेपालगन्ज, चैत २० गते । बाँकेको राप्ती सोनारी गाउँपालिका–६ डाँडा टेपरीमा हाइसको ठक्करबाट एक बालकको मृत्यु भएको छ । मृत्यु हुनेमा स्थानीय पाँच वर्षीय सुगन राना रहेका छन् ।
जिल्ला प्रहरी कार्यालय बाँकेका अनुसार दाङबाट नेपालगन्ज आउँदै गरेको भे १ ज १५०५ नम्बरको ईभी हाइसले बाटोमा हिँडिरहेका रानालाई शुक्रबार बिहान ११:३० बजे ठक्कर दिएको थियो । हाइसको ठक्करबाट गम्भीर घाइते भएका बालकलाई तत्काल उपचारका लागि नेपालगन्जस्थित भेरी अस्पताल पठाइएकामा उपचारकै क्रममा दिउँसो १२:२० बजे मृत्यु भएको प्रहरीले जनाएको छ ।
दाङको लमही नगरपालिका वडा नम्बर ५ बस्ने अजय केसीले चलाएको उक्त हाइस बालकलाई ठक्कर दिएर भागेको थियो । भागेको सवारी साधनलाई डुडुवा गाउँपालिकाको कम्दीमा प्रहरी सहायक निरीक्षक प्रेम विकको कमान्डमा खटिएको टोलीले नियन्त्रणमा लिएको जिल्ला प्रहरी कार्यालय बाँकेले जनाएको छ । प्रहरीले घटनाबारे थप अनुसन्धान भइरहेको बताएको छ ।
यसैबीच, बालकको मृत्यु भएपछि आक्रोशित स्थानीय र आफन्तले विरोध प्रदर्शन गर्दै नेपालगन्ज–अगैया हुलाकी सडक अवरुद्ध पारेका छन् । स्थानीयले सडकमा ढुङ्गामुढा र मुढा राखेर सवारी आवागमन बन्द गराएको राप्ती सोनारीको टपरीबाट स्थानीय हेमन्त चौधरीले जानकारी दिनुभयो ।
-square-thumb.jpg)
-original-thumb.jpg)
