शताब्दी–शताब्दीदेखि
तिम्रो आँखामा प्रतिविम्बित नेपाल
ती कलाकारहरूको सौन्दर्ययुक्त समर्पण
देशलाई सभ्यता र संस्कृतिको उत्कर्षमा पु-याउने
विशिष्ट सिर्जनाहरू थिए ।
त्यसैले....
तिमीले यो देशलाई
शान्त र स्निग्ध स्वरूप दिएका थियौ ।
तिमीलाई ती प्रदूषित हातहरूबाट उता लगिँदा
सभ्यता, संस्कृति र
अरू धेरै कुराहरू पनि गएका थिए,
धेरै कुराहरू खण्डित भएका थिए ।
तिमी फर्कंदा...
तिमीसँगै,
हाम्रो जित पनि फर्केको छ
इतिहासले निर्माण गरेको
आस्था र विश्वास मात्र होइन,
यो देशप्रतिको निश्चिन्तता मात्र होइन
धेरै–धेरै कुराहरू फर्केका छन् ।
तिमीलाई उता लग्ने अब यहाँ
कोही हुने छैन ।
यो अठोट पनि तिमीसँगै फर्केको छ ।
ती हातहरू...
तिमीलाई उता पु¥याउने हातहरू
तिनीहरूलाई निगरानीमा राखेर
हामी हेरिरहेका छौँ
हाम्रो हेराइको विवशता र
अरू सबै विवशताहरूबाट उठेर
यो देशले अब,
अगाडिको पाइला टेकिसकेको छ
हामीले आर्जन गरेको शक्तिमा आबद्ध भएर ।
ती हातहरूले
तिमीलाई स्पर्श गर्न खोज्दा
त्यसलाई निस्तेज पार्ने तत्परता हामीसित छ
त्यो स्पर्श...
त्यसको हातको कठोर स्पर्शलाई
निस्तेज पार्न,
घृणाले र आक्रोशले प्रतिकार गरेर
तिरस्कारका आँखाले त्यसलाई हेनुपर्छ ।
हो, हामीसित प्रतिशोध छैन
तर तिरस्कार र चेतावनी बाँकी नै छ ।
तिमीलाई उता लग्ने ती हातहरू,
ती कठोर हातहरू
प्रत्येक दिन तिनीहरूको खान्तलासी लिएर
स्टोलन इमेजेज अफ नेपालको अगाडि
अङ्कित गरेर,
तिनीहरूलाई प्रदर्शनीमा राख्नुपर्छ ।
तिम्रो आगमनको यो जितमा
खुसीको नयाँ अध्यायहरू थप्दै
आश्वस्तता हस्तान्तरण गरेर
तिमीलाई धेरै–धेरै हस्ताक्षरहरूले
सुरक्षा प्रत्यायोजन गरिसकेको छ ।
सिफल हाइट, काठमाडौँ ।
