१६ औं राष्ट्रपति रनिङ शिल्ड प्रतियोगिता माघ २३ गतेदेखि

चन्द्र पन्दाक
ताप्लेजुङ, पुस २१ गते । ताप्लेजुङमा जिल्लास्तरीय १६ औं राष्ट्रपति रनिङ शिल्ड प्रतियोगिता आगामी माघ २३ गतेदेखि सञ्चालन हुने भएको छ । जिल्ला खेलकुद विकास समितिका अनुसार राष्ट्रपति रनिङ शिल्ड प्रतियोगिता माघ २३ देखि २६ गतेसम्म सिदिङ्वा गाउँपालिकामा सञ्चालन हुने भएको हो ।

जिल्ला खेलकुद विकास समितिले सोमबार सदरमुकाम फुङ्लिङमा पत्रकार सम्मेलन गरी प्रतियोगिताबारे जानकारी गराएको हो । सिदिङ्वा गाउँपालिकाको संयोजन र जिल्ला खेलकुद विकास समितिको आयोजनामा प्रतियोगिता हुन लागेको समितिका अध्यक्ष नरेन्द्रकुमार लिम्बू (गणेश) ले जानकारी दिनुभयो ।

सिदिङ्वा गाउँपालिका अध्यक्ष मानबहादुर राई, उपाध्यक्ष कृष्णकुमारी कडरिया (बन्दना), निमित्त प्रमुख प्रशासकीय अधिकृत तिवेन्द्र अधिकारीसहितको उपस्थितिमा पत्रकार सम्मेलन आयोजना गरिएको छ । जिल्ला खेलकुद विकास समितिका अध्यक्ष लिम्बूका अनुसार सिदिङ्वा गाउँपालिकाको प्रशासकीय केन्द्र रहेको वडा–४ साब्लाखुमा प्रतियोगिता सञ्चालन हुने छ ।

प्रतियोगितामा समावेश गरिने विधामा भलिबल, कबड्डी, एथलेटिक्स, सितोरियो कराँते, तेक्वान्दोलगायत रहेका छन् । उक्त विभिन्न विधाअन्तर्गत ६६ स्वर्ण, ६६ रजत र ७० कास्य गरी कुल २०२ पदकका लागि छात्र छात्राले प्रतिस्पर्धा गर्ने जिल्ला खेलकुद विकास समितिका कार्यालय प्रमुख यज्ञनिधि पौडेलले जानकारी दिनुभयो । पौडेलका अनुसार प्रतियोगितामा जिल्लाका नौ वटा स्थानीय तहमा रहेका विद्यालयले सहभागिता जनाउने छन् ।

यता जिल्लास्तरीय राष्ट्रपति रनिङ शिल्ड प्रतियोगितालाई व्यवस्थित रुपमा सम्पन्न गर्नका लागि पालिकाले आवश्यक तयारी गरिरहेको गाउँपालिका अध्यक्ष राईले बताउनुभयो । उहाँका अनुसार गतवर्ष नै सिदिङ्वा गाउँपालिकामा प्रतियोगिता हुने टुङ्गो लागे यतादेखि नै खेलमैदान निर्माणलाई पूर्णता दिने लगायतका विषयमा पालिकाले तयारी सुरु गरेको थियो ।

प्रतियोगिता साब्लाखुस्थित टावरडाँडा खेलमैदानमा सञ्चालन हुने गाउँपालिकाकी उपाध्यक्ष कडरियाले जानकारी दिनुभयो । गत वर्ष यहाँको मैवाखोला गाउँपालिकामा १५ औं राष्ट्रपति रनिङ शिल्ड प्रतियोगिता सञ्चालन गरिएको थियो ।