नवीनराज कुइँकेल
लमजुङ, पुस २ गते । लमजुङ उद्योग वाणिज्य संघको आयोजनामा माघ ८ गतेदेखि २० गतेसम्म नवौँ लमजुङ महोत्सव हुने भएको छ । लमजुङ उद्योग वाणिज्य संघले पत्रकार भेटघाट कार्यक्रम गरी महोत्सव तथा स्वर्ण जयन्तीका बारेमा जानकारी गराएको हो ।
लमजुङ महोत्सवको नारा ‘स्थानीय उत्पादनमा वृद्धि, उद्योग–व्यापार व्यवसायमा उन्नति : कला, संस्कृति र पर्यटन प्रवर्धन समग्र लमजुङको सम्वृद्धि’ भन्ने रहको छ । लमजुङ उद्योग वाणिज्य संघका अध्यक्ष भरतकुमार श्रेष्ठले महोत्सवबाट जिल्लाको आर्थिक विकासमा टेवा पुग्ने बताउनुभयो ।
अध्यक्ष श्रेष्ठका अनुसार महोत्सवले जिल्लामा उत्पादन हुने स्थानीय कृषि उत्पादन, घरेलु तथा साना उद्योगका सामग्रीको बजार प्रवर्धन गर्ने, स्थानीय उद्योग, व्यापार तथा व्यवसायलाई आर्थिकरूपमा सशक्त र गतिशील बनाउने, जिल्लाको मौलिक कला, संस्कृति, धार्मिक क्रियाकलाप, रीतिरिवाजको संरक्षण तथा प्रचार–प्रसार गर्ने, आन्तरिक तथा बाह्य पर्यटन प्रवर्धन गरी लमजुङलाई पर्यटन गन्तव्यको रूपमा स्थापित गर्न पहल गर्नेछ ।
यसैगरी स्थानीय कलाकार, उद्यमी, किसान तथा व्यवसायीलाई प्रोत्साहन प्रदान गर्ने, रोजगारी सिर्जना तथा स्थानीय आर्थिक चक्रलाई मजबुत बनाउन टेवा दिने महोत्सवको उद्देश्य रहेको अध्यक्ष श्रेष्ठले बताउनुभयो ।
महोत्सवका प्रमुख आकर्षणमा स्थानीय तथा राष्ट्रियस्तरका कलाकारको लोक तथा दोहोरी, आधुनिक गायन प्रस्तुति, जिल्लाका मौलिक नाच, गीत, वेशभूषा र सांस्कृतिक प्रस्तुति, स्थानीय कृषि उत्पादन, घरेलु तथा साना उद्योगका स्टलहरू, हस्तकला, जडीबुटी, खाद्यपरिकार तथा स्थानीय उत्पादनको प्रदर्शनी, औद्योगिक, व्यापारिक तथा व्यावसायिक प्रविधियुक्त प्रदर्शनीकक्ष रहने उद्योग वाणिज्य संघका महासचिव विपिन श्रेष्ठले बताउनुभयो ।
उहाँका अनुसार धार्मिक तथा सांस्कृतिक झाँकी, खेलाडी तथा विद्यार्थी खेलाडीद्वारा खेल कौशल, मनोरञ्जनात्मक कार्यक्रम, बालउद्यान तथा खेलकुद गतिविधिहरु रहने श्रेष्ठले बताउनुभयो ।
बेसीशहर –७ सहजी खेलमैदानमा १३ दिनसम्म सञ्चालन हुने महोत्सवमा कुल २ सय २५ स्टल राखिने भएको छ । महोत्सव अवधिभर १ लाख ५० हजार दर्शकले अवलोकन गर्ने अपेक्षा गरिएको लमजुङ उद्योग वाणिज्य संघका प्रथम उपाध्यक्ष विकास श्रेष्ठले जानकारी दिनुभयो ।
महोत्सव सञ्चालनका लागि ९५ लाख ६५ हजार खर्च लाग्ने अनुमान गरिएको छ । यसैगरी पुस २६ गते संघको स्वर्ण जयन्तीको अवसरमा संस्थापक अध्यक्ष तिलकबहादुर पौडेलको अर्धकदको शालिक अनावरण र पूर्व अध्यक्षसहितका पदाधिकारीलाई सम्मान गर्ने कार्यक्रम राखेको वाणिज्य संघले जनाएको छ ।
