गोरखापत्र अनलाइन
काठमाडौं, मंसिर १४ गते । फागुन २१ गतेका लागि तोकिएको प्रतिनिधिसभा सदस्य निर्वाचनमा सञ्चार माध्यमको भूमिका र निर्वाचन आचारसंहिता कार्यान्वयन प्रभावकारी बनाउने विषयमा प्रेस काउन्सिल नेपाल र निर्वाचन आयोगका पदाधिकारीबिच छलफल भएको छ।
आइतबार निर्वाचन आयोगमा विगतका निर्वाचनमा पनि सञ्चार माध्यममा निर्वाचन आचारसंहिता अनुगमनको कार्य आयोगसँग समन्वय गरी प्रेस काउन्सिलबाट हुँदैआएको हुँदा यस पटकको निर्वाचनमा पनि आचारसंहिता अनुगमन प्रेस काउन्सि8लले नै भूमिका खेल्नुपर्ने विषयमा छलफल भएको हो ।
पत्रकार आचारसंहिताको आधारमा निर्वाचन आचारसंहितामा नमिलेका विषय मिलाएर अनुगमनको कार्य काउन्सिलले गर्ने भएको छ। सञ्चार माध्यमबाट निष्पक्ष र स्वतन्त्ररुपमा सामग्री सम्प्रेषण भए नभएको अनुगमन गर्ने सञ्चार जगतको नियामक निकाय प्रेस काउन्सिल भएको हुँदा निर्वाचन आयोग काउन्सिलसँग समन्वय र सहकार्य गर्न आग्रह गरेको छ ।
काउन्सिलका मुख्य अधिकृत झबिन्द्र भुसालका अनुसार छलफलमा विगतको तुलनामा यस पटक सामाजिक सञ्जालहरूबाट घृणास्पद अभिव्यक्ति, दुष्प्रचारयुक्त सामग्रीका साथै एआइको प्रयोग गरी सामग्रीहरू सम्प्रेषण हुने प्रवृत्ति देखिएको हुँदा चुनौतीपूर्ण भएको छ । प्रेस काउन्सिल नेपालको भूमिका निर्वाचनमा अहम रहेको हुँदा आयोग समन्वय र सहकार्य गर्न तयार रहेको कार्यवाहक प्रमुख निर्वाचन आयुक्त रामप्रसाद भण्डारीले बताउनुभयो ।
छलफलमा निर्वाचन आयोगका कार्यवाहक प्रमुख निर्वाचन आयुक्त भण्डारी, आयुक्तहरु डा. जानकीकुमारी तुलाधर, सगुन शमशेर जबरा, आयोगका सचिव महादेव पन्त, सहसचिवहरूको उपस्थिति थियो ।
काउन्सिलको तर्फबाट सदस्यहरु विजयराज अधिकारी, बालकृष्ण अधिकारी, कुमारी निमा काफ्ले, शन्तराम बिडारी, सदस्य सचिव छबिन्द्र पराजुली, मुख्य अधिकृत झबिन्द्र भुसाल, सहप्रशासकीय अधिकृत रामशरण बोहराको उपस्थिति थियो ।
