प्रेम अधिकारी
पशुपतिनगर (इलाम), मङ्सिर १४ गते । इलामको सूर्योदय नगरपालिका–१०, फिक्कल बजारमा कपडा बैँक स्थापना गरिएको छ । “हुनेले दिने, नहुनेले लिने” नारासहित आइतबार सिनियर टीम फिक्कलको पहलमा कपडा बैँक स्थापना गरी उद्घाटन गरिएको हो ।
कपडा बैँकको कार्यक्रमबिच सूर्योदय नगरपालिकाका नगर उपप्रमुख दुर्गाकुमार बरालले उद्घाटन गर्नुभयो । जाडोयाममा लुगा अभावमा कठिनाइ भोगिरहेका नागरिकलाई सहयोग गर्ने उद्देश्यले स्थापना गरिएको बैँकमा घरमा प्रयोग नभएका कपडा डोनेसन गर्न आह्वान गरिएको छ ।
कार्यक्रममा नगर उपप्रमुख बरालले गरिबीको रेखामुनी रहेका नागरिकलाई कपडा बैँक स्थापना भएपछि सहज भएको बताउनुभयो । उहाले भन्नुभयो, ‘सेवाभावले सुरु गरिएको कपडा बैँकले तल्लोस्तरका नागरिकलाई राहत मिलेको छ ।’
कार्यक्रमका संयोजक राजन प्रधानले बैँकलाई चाँडै कानुनी रूपमा दर्ता गरी दिगो रूपमा सञ्चालन गर्ने जानकारी दिनुभयो । दैनिक खुला रहने कपडा बैँकबाट आवश्यकता अनुसार नागरिकले निःशुल्क लुगा लिन सक्ने व्यवस्था गरिएको सिनियर टिक फिक्कलका सदस्य शरण फागोले जानकारी दिनुभयो ।
उक्त कपडा बैँकबाट स्थानीयले कपडा लैजान सुरु गरेका छन् । सिनियर टिम फिक्कलले रक्तदान कार्यक्रम, बाढीपहिरोमा श्रमदानजस्ता सामाजिक काम गर्दैआएको छ ।
