प्रदेश नीति तथा आयोगमा रिजाल र लामिछाने नियुक्त

फडिन्द्र अधिकारी

लेखनाथ, चैत २२ गते। गण्डकी प्रदेशको नीति तथा योजना आयोगमा शुक्रबार दुई सदस्य नियुक्ति गरिएको छ। शुक्रबार साँझ बसेको मन्त्रिपरिषद बैठकले पर्वतका डा योगेन्द्रराज रिजाल र कास्कीकी दुर्गा लामिछानेलाई सदस्य नियुक्त गरेको भौतिक पूर्वाधार विकास तथा यातायात व्यवस्था मन्त्री प्रकाशबहादुर केसीले जानकारी दिनुभयो। 

रिजाल सत्तारुढ नेकपा (एमाले) र लामिछाने नेपाली कांग्रेसको कोटाबाट नियुक्त हुनुभएको हो। पर्वतको फलेवास नगरपालिकाका रिजालले यसअघि गण्डकी प्रदेश सरकारले गठन गरेको कालीगण्डकीको सम्भाव्यता अध्ययन समितिको सदस्य रहेर काम गरिसक्नुभएको छ। 

कास्कीको लेखनाथकी लामिछाने नेपाली कांग्रेसकी महाधिवेशन प्रतिनिधि हुनुहुन्छ। अधिवक्तासमेत रहनुभएकी लामिछानेले अन्तर्राष्ट्रिय सम्बन्ध विषयमा विधावारिधि गर्दै हुनुहुन्छ।  

नेपाल समाजवादी पार्टी (नयाँशक्ति)को कोटाबाट नियुक्त हुनभएकी माया तिम्सिना र राप्रपाको कोटाबाट नियुक्त हुनुभएका दीपक भण्डारीले चैत १७ गते राजीनामा दिएपछि अहिले नयाँ सदस्य नियुक्त गरिएको हो। योजना आयोगको उपाध्यक्षमा भने गोरखाका डा कृष्णचन्द्र देवकोटा हुनुहुन्छ।