राजकुमार भट्टराई
खोटाङ, फागुन १५ गते । खोटाङको घोपाटारस्थित माझी बस्तीमा लिफ्टिङमार्फत सिँचाइ सुविधा पुर्याइएकाे छ । दूधकोसी छेउमै बस्ती रहे पनि सिँचाइको अभाव हुँदा लिफ्टिङमार्फत कोसीको पानी तानिएको हो ।
जिल्लाको हलेसी तुवाचुङ नगरपालिका–४ बडहरे घोपाटारमा ३३ घर माझी समुदायको बसोवास रहेको छ । तीन घर अन्य समुदायका पनि रहेका छन् । सबै घरलाई सिँचाइ सुविधा पुग्ने गरी लिफ्टिङ गरिएको घोपाटार सिँचाइ आयोजनाको औपचारिकरूपमा उद्घाटन गरिएको छ । सङ्घीय वन तथा वातावरण मन्त्री ऐनबहादुर शाही ठकुरीले आयोजनाको उद्घाटन गर्नुभएको हो ।
डिसिआरयाल-जलाधारमा आधारित जलवायु उत्थानशिल जीविकोपार्जन आयोजनाले ५५ लाख ६७ हजार लगानीमा दूधकोशीको पानी घोपाटार निकालेको हो । योजनाको काम सम्पन्न भएपछि बुधबार आयोजनाले हलेसी तुवाचुङ नगरपालिका र स्थानीय उपभोक्ता समितिलाई हस्तान्त्रण गरेको बडहरेका वडाध्यक्ष किशोर बस्नेतले बताउनुभयो ।
चार घण्टा मा ८० हजार लिटर पानी तान्न सक्ने क्षमताको सौर्य लिफ्टिङ योजना सम्पन्न भएर सञ्चालनमा आएसँगै माझी समुदाय खुसी भएका छन् । गाउँमा रहेको मुख्य ट्याङ्कीमा करिब ८ महिना अगाडि पानी निकालिएको थियो । हाल उक्त मुख्य ट्याङ्कीबाट नागरिकको हरेक घरसम्म पानी पुर्याउने काम सम्पन्न भएपछि औपचारिकरूपमा उद्घाटन गरिएको अध्यक्ष बस्नेतको भनाइ छ ।
दूधकोसी भन्दा करिब १०० देखि २०० मिटर माथि रहेको घोपाटारमा खानेपानीका लागि दुःख सुख काम चलिरहेको थियो। तर सिँचाइका लागि पानी नहुँदा सबै जग्गा जमिन सुख्खा थिए । सिँचाइको सुविधासँगै माझी समुदायले आधुनिक तरकारी खेती सुरु गरिसकेको छ । आयोजनाले सबै घरलाई कृषि खेतीका लागि एउटा टनेला र थोपा सिँचाइ प्रदान गरेको छ । केही समय अघि घरमा पानी पुगेका परिवारले टमाटर, काउली, आलु लगायतका तरकारी फलाउन थालिसकेका छन् ।
माझी समुदायलाई जीविको पार्जनमा सहज होस् भनेर लिफ्टिङ योजना सञ्चालन गरिएको हलेसी तुवाचुङ नगरपालिकाका मेयर विमला राईले बताउनुभयो । सोही अनुसार अहिले तरकारी खेतीहरू पनि सुरु गरेको देखिएको उहाँको भनाइ छ ।
सिँचाइको सुविधा भएसँगै विभिन्न मौसम अनुसारको एवं बेमौसमी तरकारीसँगै फलफूल रोपेर आम्दानी गर्ने माझी समुदायको योजना छ ।
दूधकोसीको पानी लिफ्टिङ गरेर घोपाटार ल्याएसँगै माझी समुदायका करिब ४०० रोपनी जग्गा जमिन सिँचाइ हुने अनुमान गरिएको छ । लिफ्टिङ प्रणालीले माझी समुदायको जीवन यापनमा परिवर्तन ल्याउने विश्वास गरिएको छ ।
