फिदिम नगरपालिका ६ को प्रशासकीय भवन उद्घाटन

फिदिम, फागुन ८ गते । पॉचथरको फिदिम नगरपालिका–६ को वडा कार्यालय भवन उद्घाटन भएको छ । भवन उद्घाटन कोशी प्रदेशका पूर्व आर्थिक मामिला तथा योजना मन्त्री एवं नेकपा (माओवादी केन्द्र) कोशी प्रदेश संसदीय दलका नेता इन्द्रबहादुर आङबो (मौसम) ले गर्नुभएको हो ।

भवनको शिलान्यास सांसद नेम्वाङले तीन वर्ष अघि गर्नुभएको थियो । भवन निर्माणका लागि आर्थिक वर्ष २०७९/८० र २०८०/८१ गरी प्रदेश सरकार बाट बजेट विनियोजन भएको वडाध्यक्ष विपन तुम्रोकले जानकारी दिनुभयो ।

प्रदेश सरकारबाट प्राप्त ८० लाख र फिदिम नगरपालिकाबाट १५ लाख गरी कुल ९५ लाख रुपियाँमा भवन निर्माण गरिएको तुम्रोकको भनाइ छ।

नव निर्मित दुई तले भवनमा जिन्सी शाखा, प्रविधिक शाखा, गेस्ट रुमसहित नौ कोठा छन् । ६ नम्बर वडाको कार्यालय भवन निर्माण सकिएसँगै अब फिदिम नगरपालिकाका १३ वटा वडाले आफ्नै भवनबाट कार्य सम्पादन सुरु गरेका छन् । वडा नम्बर ४ को भने भवन निर्माण प्रक्रिया नै सुरु भएको छैन ।