म्युजिक भिडियो ‘मेरो सुन्दर संसार’ सार्वजनिक

सिराज खान 

नेपालगन्ज, माघ ५ गते । बाँके खजुरा निवासी युवाकवि, लेखक र गीतकार मणिदेव अर्याल (मणिरत्न) को गीतको संगालो ‘मेरो सुन्दर संसार’ गायक नरेन्द्र प्यासीको स्वरको म्युजिक भिडियो सार्वजनिक भएको छ ।

मणिरत्नका शब्द ‘मेरो सुन्दर संसार’ मा प्रभात सुवेदीले दिएको संगीत सिर्जनालाई निर्देशक हरिशरण रिजालले म्यूजिक भिडियोका रुपमा पस्किनु भएको कवि तथा गीतकार मणिदेव अर्यालले बताउनुभयो । 

उहाँले यो एल्बममा आफै पनि कलाकारको भूमिकामा देखिएको जनाउँदै ‘मेरो सुन्दर संसार’ को म्यूजिक भिडियोमा निर्देशक रिजालसँग आरती आचार्यले मुख्य भूमिका खेल्नु भएको बताउनुभयो । 

झण्डै दर्जन गीत रेकर्ड गराइसक्नु भएका अर्यालले ७ वटा गीतको म्यूजिक भिडियो बनाइसक्नु भएको छ । उहाँले भन्नुभयो, ‘गीत लेख्ने क्रमलाई तिब्रता दिइरहेको छु, दर्शक स्रोताको रेस्पोन्सका आधारमा यसलाई झन गति दिने हो ।’

नेपाल प्रज्ञा प्रतिष्ठानका काव्य विभागका सदस्य, महेन्द्र पुस्तकालयका सचिव तथा प्रगतिशील लेखक संघका केन्द्रिय सदस्य समेत रहनुभएका अर्यालका निवन्ध संग्रह कुटी र उपन्यास फिर्ती प्रकाशित भइसकेका छन् ।