करणी गरेको आरोपमा युवक पक्राउ

अविनाश चौधरी

धनगढी, पुस २२ गते । एक किशोरीलाई जवर्जस्ती करणी गरेको आरोपमा कैलाली प्रहरीले गौरीगंगा नगरपालिका –६ बनबेहडाका २७ वर्षीय हरिराम चौधरीलाई पक्राउ गरेको छ । 

धनगढी उपमहानगरपालिका –१२ की १८ वर्षीया किशोरीले दिएको उजुरीको आधारमा धनगढीको अदालत रोडबाट आरोपितलाई पक्राउ गरिएको हो । चौधरीले डरधम्की देखाएर गत वैशाखदेखि भदौसम्म पटक पटक करणी गरेको भन्दै किशोरीले जाहेरी दिएको जिल्ला प्रहरी कार्यालयका प्रवक्ता प्रहरी नायब उपरीक्षक कवीन्द्रसिंह बोहराले जानकारी दिनुभयो । 

पीडितको उजुरीको आधारमा आरोपितलाई पक्राउ गरेर कारबाही प्रक्रिया अगाडि बढाएको उहाँको भनाइ छ । चौधरीले गत वैशाख १५ गतेदेखि भदौसम्म धनगढीको जाखोर तालस्थित जङ्गलमा लगेर आफूलाई पटक पटक करणी गरेको भन्दै पीडित किशोरीले किटानी जाहेरी दिएको प्रहरीको भनाइ छ । आइतबार जाहेरी परेपछि सोही दिन आरोपितलाई पक्राउ गरिएको बोहराले जानकारी दिनुभयो ।