गोरखापत्र समाचारदाता
काठमाडौँ, मङ्सिर २५ गते । गायिका अस्मिता अधिकारी तथा गायक मुकुन्द त्रिपाठीको ‘जाऊँ हिँड पोखरा’ सार्वजनिक भएको छ । शब्द, सङ्गीत र निर्देशन मुकुन्द त्रिपाठीकै रहेको यो सिर्जना नेपाली साङ्गीतिक बजारमा एउटा रोचक प्रस्तुति रहने विश्वास निर्देशकको रहेको छ । राजु सुनामको एरेन्ज र विनोद परियारको सम्पादन रहेको गीतलाई प्राविधिक हिसाबले उत्कृष्ट बनाउने प्रयास गरिएको त्रिपाठीले बताउनुभयो । भिडियोमा गायक त्रिपाठीसँगै सरिता दनकुटी र अनुभव त्रिपाठीको अभिनय छ । सुवास सुवेदीको छायाङ्कन रहेको गीतको सम्पादन र कलरिङ सुवास अम्गाईंको छ । भिडियोमा युमी बलामीको नृत्य निर्देशन रहेको छ । दुर्गा न्यौपाने त्रिपाठीद्वारा प्रस्तुत गीत मुकुन्द त्रिपाठीको आधिकारिक युट्युब च्यानलमा सार्वजनिक गरिएको हो । गीतले साङ्गीतिकप्रेमीको मन जित्ने विश्वास निर्माण समूहले व्यक्त गरेको छ ।
