केशवचन्द्र महरा
दिपायल, मंसिर १६ गते । डोटी जिल्लाको पूर्वीचौकी गाउँपालिका ६ कोे वडाध्यक्षमा कांग्रेसका मोहन थापा विजय हुनुभएको छ । आइतबार सम्पन्न उपनिर्वाचन अन्तर्गत ४६८ मतसहित उहाँ विजयी हुनुभएको हो ।
निर्वाचन अधिकृतको कार्यालयका अनुसार उहाँका निकटम प्रतिद्वन्द्वी नेकपा (एमाले) का उमेदवार देवबहादुर थापाले ३०१ मत प्राप्त गर्नुभयो । त्यस्तै अर्का प्रतिद्वन्द्वी राष्ट्रिय स्वतन्त्र पार्टीका उमेदवार जानकी खड्का कुँवरले ३१ मत प्राप्त गर्नुभयो । नेकपा माओवादी केन्द्रका उम्मेदवार देवीलाल थापाले २६ मत प्राप्त गर्नुभयो । १३ मत बदर भएको छ।
एक हजार ५ सय ९३ मतदाता रहेको उक्त वडामा ८ सय ३९ मत खसेको थियो । २०७९ मा सम्पन्न स्थानीय तहको निर्वाचनमा नेपाली कांग्रेसले सो पालिकामा ‘क्लीन स्वीप’ गरेको थियो । उक्त वडामा कांग्रेसका उम्मेदवार पुष्पराज जोशीले जीत हात पारेका थिए । जोशीको निधन पश्चात् यहाँ उपनिर्वाचन भएको हो ।
