काठमाडौँ, मङ्सिर १६ गते । लोकप्रिय गीतकार गोविन्द भट्टको पछिल्लो म्युजिक भिडियो ‘जुनेली’ सार्वजनिक भएको छ । आइतबार ‘गरिमा फिल्मस्’ मार्फत उक्त भिडियो सार्वजनिक गरिएको हो ।
गीतमा समीक्षा अधिकारीको स्वर रहेको छ भने सङ्गीत बाबुल गिरीले दिनुभएको छ । भिडियोमा गोविन्द भट्ट, रिना गुरुङ, प्रेम सुब्बा, कविता आले, सुवास गजुरेललगायतका कलाकारको जोडदार अभिनय रहेको छ । उत्सव दाहालले छायाङ्कन र सहिल खानले सम्पादन गर्नुभएको सो भिडियोको निर्देशक देवेन्द्र पाण्डे हुनुहुन्छ ।
धादिङ जिल्लाको रुवी भ्यालीको रमणीय स्थलमा छायाङ्कन गरिएको उक्त भिडियो फिल्मी शैलीको रहेकाले यसलाई म्युजिक भिडियोको क्षेत्रमा नयाँ आयमको रूपमा लिइएको छ ।
यसमा जिम्मलली छोरीले गोठालोसँग गरेको प्रेमकथा कहानी उतारिएको छ । भिडियो सार्वजनिकको पूर्वसन्ध्यामा ल्याइएको पोस्टरकै आधारमा टिकटकमा समेत ‘भाइरल’ भइसकेको छ ।
उसो त भट्टको हालसम्म दुई दर्जनभन्दा बढी गीत प्रकाशन भइसकेका छन् भने एक सय हाराहारीमा प्रकाशोन्मुख छन् । लोकदोहोरी, आधुनिक, चलचित्र सबै विधाका गीत लेख्ने उनको चलचित्र ‘सिटामोल’ छिट्टै आउँदै छ ।
भट्टले गीत लेखनबाट थुप्रै सम्मान, पुरस्कार तथा अवार्ड पाइसक्नुभएको छ । हालै उहाँले ‘चौथो स्पर्स म्युजिक भिडियो अवार्ड–२०८१’ मा सर्वोत्कृष्ट गीतकारको अवार्ड पाउनुभएको थियो ।
