सर्लाहीमा बस र पिकअप ठोक्कियो, एकको मृत्यु, १२ घाइते

जनार्जन खत्री
सर्लाही, जेठ ४ गते । पूर्व–पश्चिम राजमार्गअन्तर्गत सर्लाहीको बाँके जङ्गलमा बुधबार दिउँसो यात्रुबाहक बस र माछा बोक्ने पिकअप दुर्घटना हुँदा एकजनाको मृत्यु भएको छ ।

दुर्घटनामा अन्य १२ जना सामान्य घाइते भएका छन् । बर्दिवासतर्फबाट आइरहेको प्रदेश ३–०१–०२५ च  ५७४३ नम्वरको पिकअप र विपरीत दिशाबाट गइरहेको ना ५ ख ५५१५ नम्बरको बस एक आपसमा ठोक्किएर दुर्घटना भएको प्रहरीले जनाएको छ ।

दुर्घटनामा बसका सहचालक सुनसरीको इटहरी उपमहानगरपालिका–४, बस्ने वर्ष ३७ का भिम राजवंशीको घटनास्थलमै मृत्यु भएको हो । दुर्घटनामा घाइते भएका १२ जनाको लालबन्दीमा उपचार चलिरहेको छ ।

प्रारम्भिक अनुसन्धानमा तीव्र गतिमा आइरहेको पिकअपलाई जोगाउन खोज्दा यात्रुबाहक बस अनियन्त्रित भई पल्टिएको प्रहरीले जनाएको छ । बस पल्टिँदा सहचालकको त्यसैमा च्यापिएर मृत्यु भएको हो ।

बससँग ठोक्किँदा पिकअप पनि सडकबाट खसेर जङ्गलभित्र छिरेको छ । दुर्घटनापछि बसका चालक प्रहरी नियन्त्रणमा रहेका छन् भने फरार रहेका पिकअपका चालकको खोजी भइरहेको इलाका प्रहरी कार्यालय केशरगञ्जका प्रहरी निरीक्षक रोशन थापाले जानकारी दिनुभयो ।