भावना जोशी
अत्तरिया, मङ्सिर १३ गते । कैलालीको गोदावरी नगरपालिका चौकीडाँडामा ट्याक्टरको ठक्करबाट घाइते एक जनाको मृत्यु भएको छ । गोदावरी नगरपालिका–३ भैँसी हाटबजारस्थित सडकमा बुधबार साँझ ट्याक्टरको ठक्करबाट बैतडीको डिलासैनी गाउँपालिका–६ का २२ वर्षीय थलाल घाइते हुनु भएको थियो ।
गोदावरी नगरपालिका–३ का मुनिम चौधरीले चलाएको से २ त ४५२३ नम्बरको ट्याक्टरले से ६ प ९२९४ नम्बरको मोटरसाइकललाई ठक्कर दिएको थियो ।
घाइते थलालको सेती प्रादेशिक अस्पतालमा उपचारको क्रममा मृत्यु भएको जिल्ला प्रहरी कार्यालय कैलालीका प्रवक्ता दर्शन खड्काले जानकारी दिनुभयो । मृतकको शव पोष्टमार्टमका लागि सेती प्रादेशिक अस्पतालको शव गृहमा राखिएको छ । ट्याक्टर र चालकलाई मालाखेती प्रहरीले नियन्त्रणमा लिएको प्रहरीले जनाएको छ ।
