राममणि दाहाल
हेटौँडा, असोज १९ गते । मकवानपुर प्रहरीले ठुलो परिणाममा सुनसहित दुई जना भारतीय नागरिक पक्राउमा परेका छन् ।
जिल्ला प्रहरी कार्यालय मकवानपुरका प्रहरी उपरीक्षक विश्वराज खडका नेतृत्वको प्रहरी टोलीले हेटौडा उपमहानगरपालिका, वडा नं १५ रातोमाटे चेकपोस्ट स्थित पूर्व पश्चिम सडक खण्डबाट शनिवार बिहान ३ बजेको समयमा आठ केजी सुनसहित दुई जना पक्राउ गरेको पत्रकार सम्मेलन गरी जानकारी गराइएको हो ।
पलैयाबाट हेटौडातर्फ आउँदै गरेको बागमती प्रदेश ०२-०४७ प ७५०३ नम्बरको स्कुटरलाई रोकी चेकजाँच गर्ने क्रममा स्कुटर चालक भारत महाराष्ट्र राज्य सांगली जिल्ला दिघंची थाना पुजारवाडी बस्ने वर्ष २५ को अभिषेक अजिनाथ कुटी र सोही स्कुटरमा पछाडि सवार भारत महाराष्ट्र राज्य सांगली जिल्ला बस्ने वर्ष २७ को राहुल भिट्टिहाल बाडलाई सुनसहित पक्राउ गरेको प्रहरी उपरीक्षक खड्काले बताउनुभयो ।
उनीहरूको शरीर तथा स्कुटर समेत खानतलासी गर्दा शरीरको विभिन्न भागमा लुकाई छिपाई राखी ल्याइएको अवस्थामा बिजक नभएको भन्सार छलिका सुन ल्याएको भन्दै उहाँले बिस्कुटको आकारको ८ थान सुन तौल गर्दा ८ किलो २४३ ग्राम ९७० मिलिग्राम रहेको पाइएको बताउनुभयो ।
आजको बजार भाउ अनुसार सुनको मूल्य ११ करोड ४३ लाख ५७ हजार ८७८ रुपैयाँ ६५० पैसा रहेको उहाँले बताउनुभयो ।
सुन सहित निजहरू अभिषेक अजिनाथ कुटी र राहुल भिट्टिहाललाई नियन्त्रणमा लिई थप अनुसन्धान तथा कारबाहीको लागी राजश्व अनुसन्धान कार्यालय पथलैया बारा पठाउने तयारी भइरहेको प्रहरीले जनाएको छ ।
