लीलाराज खड्का
बिर्तामोड, भदौ २१ गते । झापाको बुट्टाबारीमा भएको मोटरसाइकल दुर्घटनामा घाइते हुनुभएका एक जनाको मृत्यु भएको छ । घाइते मोटरसाइकल चालक इलाम सूर्योदय नगरपालिका –५ बस्ने २४ वर्षीय दिवाङ्कर राईको उपचारका क्रममा शुक्रवार बिहान बीएण्डसी हस्पिटल बिर्तामोडमा मृत्यु भएको हो ।
भदौ १८ गते साँझ ५ बजे अर्जुनधारा नगरपालिका –११ गिरीबन्धु टि–स्टेटस्थित पूर्व–पश्चिम राजमार्गमा मुक्तिचोकबाट काँकरभिट्टातर्फ जाँदै गरेको मे १० प ३५४४ नम्बरको मोटरसाइकल र धुलाबारीबाट मुक्तिचोकतर्फ आउँदै गरेको ना ५ ख ९१२२ नम्बरको ट्रक एक आपसमा ठक्कर खाई दुर्घटना भएको थियो ।
दुर्घटनामा मोटरसाइकल चालक राई र पछाडि सवार मोरङ सुन्दरहरैचा नगरपालिका –१० बस्ने २८ वर्षीय सुबोद बस्नेत घाइते भई दुवै जनालाई बीएण्डसी हस्पिटल लगिएको थियो । बस्नेतको सोही अस्पतालमा उपचार भइरहेको छ ।
ट्रक र ट्रक चालक झापा अर्जुनधारा नगरपालिका –६ बस्ने ३१ वर्षीय सञ्जय माझीलाई इलाका प्रहरी कार्यालय अनारमनीमा राखी थप अनुसन्धान जारी रहेको जिल्ला प्रहरी कार्यालय झापाले जनाएको छ ।
