सुलीकोट समाचारदाता
सुलीकोट, साउन ३० गते । स्थानीय संस्कृति संरक्षण, प्रवर्धन र पुस्तान्तरण गर्ने उद्देश्यसति धार्चेवासीले परम्परागत चुड्का नाच सुरु गरेका छन् । धार्चे तमू सेवा समाजको आयोजनामा गुरुङ समुदायको रीतिरिवाज, वेशभूषा र संस्कृति जोगाउन चुड्का नाच संरक्षण थालिएको हो । गुरुङ समुदायमा ज्येष्ठ नागरिकले मात्र चुड्का नाच्ने प्रचलन भए पनि त्यसलाई तोड्दै युवाले चुड्का नाचेर परम्परा जोगाउने अभियान सुरु गरेका हुन् ।
धार्चेका राज गोर्खालीका अनुसार ज्येष्ठ नागरिकको मृत्युसँगै परम्परा, संस्कृतिका मौलिक पक्ष लोप हुँदै जान थालेको अवस्था छ । त्यसैले मौलिक संस्कृति र परम्परा संरक्षणका लागि गुरुङ समुदायका युवा पुस्ता सक्रिय भएका हुन् । अहिले धार्चेका १२–१२ जना युवकयुवतीलाई पराम्परादेखि चल्दै आएको चुड्का, कौडा संस्कृति जर्गेनाका लागि प्रशिक्षणसमेत गर्ने गरिएको छ । बाजाको ताल, गीतको सुर, नृत्य, ताललगायत विषयमा युवालाई प्रशिक्षण दिने गरिएको छ ।
तमू समाजका अध्यक्ष सन्तबहादुर गुरुङले चुड्का कौडासम्बन्धी आधारभूत ज्ञानलाई धार्चे गाउँपालिकाका सबै ठाउँमा विस्तार गर्दै लैजाने योजना रहेको जानकारी दिनुभयो । धार्चे गाउँपालिकाका अध्यक्ष लक्ष्मण गुरुङले गुरुङ संस्कृति र नाच सिक्न चाहनेलाई गाउँपालिकाले बजेट व्यवस्था गरी सक्दो सहयोग गर्ने बताउनुभयो ।
