अमृतप्रसाद पौडेल
म्याग्दी, साउन १५ गते । म्याग्दी सदरमुकाम बेनीमा रहेको न्यू दोभान युथ क्लवले तेस्रो न्यू दोभान कप खुल्ला अन्तर विद्यालयस्तरीय छात्रा ‘९–ए साइड’ फुटबल प्रतियोगिता आयोजना गरेको छ ।
न्यू दोभान युथ क्लबले आफ्नो क्लबका पूर्व अध्यक्ष अनन्त गिरीको स्मृतिमा खुल्ला अन्तर विद्यालय छात्रा फुटबल प्रतियोगिता सञ्चालन गर्न लागेको हो । क्लबका स्वर्गीय अध्यक्षको स्मृतिमा २०८१ भदौ ८ देखि १० गतेसम्म प्रतियोगिता सञ्चालन गरिने क्लवका अध्यक्ष उपेन्द्र गिरीले बताउनुभयो ।
खेलकुदको जग भनेकै विद्यालय स्तर भएकाले छात्राहरुमा रहेको फुटबल प्रतिभा उजागर गर्नका लागि क्लवले विगत तीन वर्षदेखि नियमित रुपमा छात्रा फुटबल प्रतियोगिताको आयोजना गरिरहेको उहाँको भनाइ छ ।
प्रतियोगितामा प्रथम हुनेले ४५ हजार रुपियाँ नगदसहित मेडल, ट्रफी र प्रमाणपत्र प्राप्त गर्नेछन् । त्यस्तै, दोस्रो हुनेले २५ हजार रुपियाँ नगदसहित ट्रफी, मेडल र प्रमाणपत्र प्राप्त गर्ने क्लबले जनाएको छ ।
प्रतियोगिताको उत्कृष्ट खेलाडी, सर्वाधिक गोलकर्ता, उत्कृष्ट गोलरक्षकलाई तीन–तीन हजार रुपियाँ नगद प्रदान गरिनेछ । त्यस्तै, प्रतियोगिताको अनुशासित टिमलाई पाँच हजार रुपियाँ नगद पुरस्कार प्रदान गरिनेछ ।
विगतका दुई वटा प्रतियोगितामा म्याग्दी, बागलुङ, पर्वतका विद्यालयबाट टिमको सहभागिता रहेको र यस वर्ष साविकको धवलागिरी अञ्चलका चार जिल्लाका साथै गण्डकी प्रदेशभित्रका अन्य जिल्लाबाट पनि सहभागिता जनाउने अपेक्षा गरिएको आयोजकले जनाएको छ ।
