.jpg)
प्रकाशविक्रम शाह
धनगढी, जेठ २८ गते । सुदूरपश्चिम प्रदेशमा थप सात मन्त्रीले पद तथा गोपनीयताको शपथ ग्रहण गर्नुभएको छ । यसअघि डेढ महिनादेखि मुख्यमन्त्रीसहित तीन सदस्यीय सरकार मात्र रहेको थियो ।
अब मन्त्रीपरिषद् १० सदस्यीय भएको छ । मुख्यमन्त्री दीर्घबहादुर सोडारीले विस्तार गरेको मन्त्री परिषद्का सदस्यलाई सोमबार प्रदेश प्रमुख नजिर मियाले एक समारोहबिच पद तथा गोपनीयताको शपथग्रहण गराउनुभयो ।
शपथग्रहण गर्नेमा नेकपा (एमाले) का सुरेन्द्र पाल आर्थिक मामिला र नेकपा (माओवादी केन्द्र) का ओमविक्रम भाट सामाजिक विकास मन्त्रालयको जिम्मेवारी पाउनुभएको छ ।
यस्तै, एमालेका वीरबहादुर थापा, हिरासिंह सार्की, माओवादीका अक्कल रावल, लक्ष्मी विक र नेकपा (एकीकृत समाजवादी) का माया पन्तले तत्काललाई विना विभागीय मन्त्रीका रूपमा शपथ ग्रहण गर्नुभयो ।
यसअघि नागरिक उन्मुक्ति पार्टीका क्रमशः कैलाश चौधरी भौतिक पूर्वाधार र टीका थापा भूमि व्यवस्था, कृषि तथा सहकारी मन्त्री नियुक्त भइसक्नु भएको छ ।
स्वतन्त्र प्रदेश सभा सदस्य डा. ताराप्रसाद जोशीलाई उद्योग, पर्यटन, वन तथा वातावरण मन्त्रालयको जिम्मेवारी दिने भनिए पनि उहाँले मन्त्री धेरै भएको र मन्त्रालय फुटाइनु ठिक नहुने भन्दै शपथग्रहण गर्न तयार हुनु भएन ।
एकीकृत समाजवादी दलका नेता समेत रहनु भएका मुख्यमन्त्री सोडारीले सहमतिमा भौतिक पूर्वाधार, सामाजिक विकास, भूमि व्यवस्था, कृषि तथा सहकारी र उद्योग, पर्यटन वन तथा वातावरण मन्त्रालय टुक्र्याउने तयारी गर्नुभएको छ । सुदूरपश्चिममा विगतमा सात मन्त्री र चार राज्यमन्त्रीसम्म बनाउने गरिएको थियो ।
डा. जोशीले शपथग्रहण नगरेपछि उद्योग, पर्यटन, वन तथा वातावरण र आन्तरिक मामिला तथा कानुन मन्त्रालयको जिम्मेवारी मुख्यमन्त्री सोडारीले आफै लिनुभएको छ ।
मुख्यमन्त्री सोडारीले शपथग्रहण कार्यक्रमपछि संक्षिप्त प्रतिक्रिया दिँदै अब सरकारलाई काम गर्न सहज हुने बताउनुभयो । शपथग्रहण कार्यक्रममा मुख्यमन्त्री सोडारी, सभामुख भीमबहादुर भण्डारी, मन्त्रीहरू, पूर्व मुख्यमन्त्रीहरू, अन्य सदस्यहरूको उपस्थिति थियो ।
