विजयकुमार साह
ढल्केबर, वैशाख २० गते । तराइ मधेशमा पानी पर्न नसकेपछि उखरमाउलो गर्मी छ । गर्मी छल्न ग्रामीण क्षेत्रका बालबालिका नहरमा पौडी खेलेर दिन बिताउँछन् । धनुषाको सबैला नगरपालिका रघुनाथपुरस्थित कमला सिँचाइ नहरमा दिनहुँ बालबालिका नुहाउन आउनुहुन्छ । उहाँहरू नहरको पानीमै खेलेर दिन बिताउनुहुन्छ । पानी त्यति सफा नभए पनि उहाँहरू रमाइलो मान्दै पौडी रहेका हुन्छन् ।
स्थानीय बालक अमन यादवले भन्नुभयो, “अहिले बिहानी पढाइ छ । त्यसपछि घरमा त्यसै बस्यो भने गर्मीले सताउँछ, त्यही भएर नहरमा नुहाउन आउँछौँ । नहरमा पौडी खेल्दा गर्मीबाट राहत पुग्छ ।”
पाैडी खेल्न कतिपय बालबालिकाबिच प्रतिस्पर्धा नै चल्छ । नहरमा धेरै पानी नभएकाले कुनै जोखिम नभएको उहाँहरूको भनाइ छ । तराई मधेशका जिल्लामा गर्मी छल्न ग्रामीण क्षेत्रका बालबालिका यसरी नै नहर र पोखरीको पानीमा नुहाउने गर्नुहुन्छ ।
यस क्षेत्रमा ४२ डिग्री सेल्सियससम्म तापक्रम पुग्ने गरेको छ । अत्यधिक तापक्रम बढेका कारण यहाँको जनजीवन प्रभावित बनेको छ । चर्को गर्मीका कारण बजार क्षेत्रमा मानिसको चहलपहल कम भएको छ भने खुला आकाशमा काम गर्ने मजदुर बढी प्रभावित भएका छन् ।
यस्तै, बढ्दो तापक्रम र तातो हावाका कारण खटिरा आउने, शरीर चिलाउने, टाउको दुख्ने, रिङटा लाग्न, ज्वरो आउनेलगायत स्वास्थ्यका समस्या देखिन थालेका छन् । बढ्दो गर्मीसँगै उपचारका लागि आउने बिरामीको सङ्ख्या बढेको स्वास्थ्य निर्देशनालय मधेश प्रदेशले जनाएको छ ।
यसै गरी, गर्मी बढेकाले बालीनाली सुक्न थालेका छन् । कतिपय चापाकललगायत पानीका स्रोत सुक्न थालेका छन् ।
