कन्हैयालाल केशरी
पर्सा, चैत २८ गते । चैते दसैँमा वीरगन्जमा पहिलो पटक गहवामाई मन्दिर परिसरबाट गहवामाईको निसान (ध्वजा) सहितको डोलीयात्रा निस्कने भएको छ ।
महाअष्टमीका दिन वैशाख ४ गते सो डोलीयात्रा निस्कने बताइएको छ । गहवामाई मन्दिर वीरगन्जका लागि मात्र नभई समग्र मधेश प्रदेशसँगै छिमेकी मुलुक भारतको बिहारका दर्शनार्थीको आस्थाको केन्द्र र शक्तिपीठको रुपमा रहेकाले गहवामाईको प्रेरणाबाट डोलीयात्राको शुभारम्भ यस वर्षदेखि माईस्थान मन्दिर सञ्चालक समितिले गर्न लागेको समितिका अध्यक्ष नरेन्द्र साहले बताउनुभयो ।
उहाँले असोजमा हुने दसैँको आफ्नै विशेष महत्व र धार्मिक महत्व र परम्परा छ, मुलुकभरि भब्यताका साथ मनाउने गरिन्छ । चैतेदसैँको पनि मधेश प्रदेशमा आफनै महत्व रहेकाले चैतेदसैँलाई भब्य बनाउन डोलीयात्राको आयोजना गरिएको छ ।
शक्तिपीठको रुपमा गहवामाइको पहिचान मुलुकभरि भएकाले दसैँ नयाँ वर्ष र अन्य धार्मिक उत्सव बाहेक दैनिक दुईदेखि तीन हजारको हाराहारीमा दर्शनार्थीहरु गहवामाईको दर्शन तथा पूजापाठ र भाकलअनुसारको प्रसाद चढाउने गरेको बताउनुभयो ।
माईस्थान मन्दिर सञ्चालक समितिका सचिव कन्हैयालाल केशरीले निसानसहितको डोलीयात्रामा लगभग दश हजारभन्दा बढीको सहभागिता हुने आँकलन गरिएको छ । गहवामाईको नगर परिक्रमा गराएमा नगरवासीको सुखशान्ति, समृद्धि प्राप्त हुने जनविश्वास रहेकाले अपेक्षा गरिएभन्दा पनि बढी भक्तजन र माताका श्रद्धालुहरुको उपस्थिति हुनसक्ने बताउनुभयो ।
बिरगन्ज महानगरपालिकाका नगर प्रमुख गहवामाई मन्दिर वीरगन्जबासीको धरोहरको रुपमा रहेकाले मन्दिरको सौन्दर्यकरण गर्ने काम चरणबद्ध रुपमा भइरहेको जानकारी दिंदै अहिले जोसुकै भक्तजन मन्दिरमा जादाँ सोको अनुभूति गर्नसक्ने दाबी गर्नुभयो ।
मन्दिरका मूल पुरोहित राधेश्याम उपाध्यायले डोली तथा निसान पूजाको शुभसाइत वैशाख ४ गते दिउँसो २ बजे र डोलीयात्राको साइत अपरान्ह ४ बजे रहेको जानकारी दिनुभयो ।
