रामेछापमा गठबन्धन अगाडि
रामेछापमा मङ्सिर ४ गते आइतबार भएको प्रतिनिधि सभा सदस्य र प्रदेश सभा सदस्य निर्वाचनको मतगणना जारी छ । एक प्रतिनिधि सभा सदस्य र दुई प्रदेश सभा सदस्यका लागि भएको निर्वाचनमा अहिले प्रदेश १ को मतगणना भइरहेको छ ।
जाजरकोटमा माओवादीका शक्ति बस्नेतकाे अग्रता
जाजरकोटमा प्रतिनिधि सभा तथा प्रदेशसभाको मतगणना जारी छ । प्रतिनिधि सभा सदस्यको एक मात्र निर्वाचन क्षेत्र रहेको जाजरकोटमा नेकपा माओवादी केन्द्रका शक्तिबहादुर बस्नेतले अग्रता लिनुभएको छ ।
सप्तरीको २ वटा क्षेत्रमा कांग्रेस अगाडि
सप्तरीको ४ वटै निर्वाचन क्षेत्रमा मतगणना जारी छ । तीमध्ये क्षेत्र नम्बर तीन र चारमा नेपाली कांग्रेस अगाडि छन् भने क्षेत्र नम्बर १ मा जसपा र क्षेत्र नम्बर २ मा जनमत पार्टी अगाडि रहेको छ ।
म्याग्दीमा मतगणना पुन : सुरु
म्याग्दीमा मतगणना पुन : सुरु गरिएको छ । मतदान अधिकृतले हस्ताक्षर नगरेका मतपत्र फेला परेपछि स्थगित भएको मतगणना फेरी सुरु भएको मुख्य निर्वाचन अधिकृतको कार्यालयले जानकारी दिनुभयो ।
पाँचथरमा एमालेको अग्रता
पाँचथरको प्रतिनिधि सभातर्फ हालसम्म सार्वजनिक भएको मत परिणाममा नेकपा एमालेका वसन्तकुमार नेम्वाङले पुनः अग्रता लिनुभएको छ ।
बाँकेका तीन वटै निर्वाचन क्षेत्रमा कांग्रेसको अग्रता
बाँकेको तीन वटै निर्वाचन क्षेत्रमा जारी रहेको मतगणनामा नेपाली कांग्रेसका सह-महामन्त्री किशोरसिंह राठौरले अग्रता लिएका छन् भने युवा तथा खेलकुद मन्त्री महेश्वर गहतराज अथक र पुर्वमन्त्री इश्तियाक राई पछाडि छन् ।
स्याङ्जामा कांग्रेसको अग्रता
स्याङ्जा क्षेत्र नम्बर १ मा नेपाली कांग्रेसका उम्मेदवार राजु थापाले झिनो मतान्तरले अग्रता लिनुभएको छ । पाँच हजार ६३३ मत गणना हुँदा थापाले दुई हजार ४५५ मत हात पार्नुभएको छ भने नेकपा एमालेका नारायण मरासिनीले दुई हजार २५५ मत हात प्राप्त गर्नुभएको हो ।
विनोद चौधरीलाई घण्टीले उछिन्यो
पश्चिम नवलपरासी क्षेत्र नम्बर १ मा विनोद चौधरीलाई राष्ट्रिय स्वतन्त्र पार्टीले उछिनेको छ ।
पाँचथरमा कांग्रेसको अग्रता
पाँचथरमा प्रतिनिधि सभातर्फको मतगणनामा अगाडि रहेका एमाले उम्मेदवार वसन्तकुमार नेम्बाङलाई पछि पार्दै गठबन्धनका कांग्रेस उम्मेदवार भीष्मराज आङ्देम्बे आउनुभएको छ ।
हुम्लाको ३४ मतदान केन्द्रका मतपेटिका हेलिकोप्टरबाट ल्याइँदै
दक्षिणी क्षेत्रका चार वटा गाउँपालिका अन्तर्गतको ३४ वटा मतदान केन्द्रको मतपेटिका हेलिकप्टरबाट ल्याइँने भएको छ । दुर्गम क्षेत्रको मतदान केन्द्रबाट पैदल मार्गबाट ढुवानी गरेर ल्याउँन जोखिम देखिएपछि निर्वाचन आयोगले हेलिकोप्टरमै ढुवानी गर्न सहमति दिएपछि मङ्गलबार दिउँसो सर्केगार्ड गाउँपालिकाको केन्द्र सर्केगार्डबाट ल्याउन लागिएको हो ।
रुकुम पूर्वमा प्रतिनिधि सभामा घर्ती र प्रदेशमा स्वतन्त्र उम्मेदवारको अग्रता
रुकुम पूर्वमा प्रतिनिधिसभामा पूर्ण घर्ती मगर र प्रदेश नम्बर १ मा सुरल पुनको अग्रता कायमै रहेको छ ।
महोत्तरी-१ मा माओवादीको अग्रता
महोत्तरी क्षेत्र नं १ मा सर्वदलीय सहमति जुटेपछि सोमबार रातीबाट मतगणना सुरु भएको छ । सुरुवाती मत परिणाम अनुसार नेकपा माओवादी केन्द्रले अग्रता लिएको हो ।
अछाम-१ मा समाजवादीका कुँवरको अग्रता कायमै
प्रतिनिधिसभातर्फको मतगणनामा अछाम क्षेत्र नं. १ मा गठबन्धनबाट एकीकृत समाजवादीका नेता तथा श्रम, रोजगार मन्त्री शेरबहादुर कुँवर दुई हजार २५३ मतान्तरले अगाडि रहनुभएको छ ।
झापा क्षेत्र नम्बर २ मा एमालेको अग्रता
झापा क्षेत्र नम्बर २ मा नेकपा एमालेका उम्मेदवार देवराज घिमिरे र स्वतन्त्र उम्मेदवार भद्रप्रसाद नेपालबीच रोचक प्रतिस्पर्धा देखिएको छ । दुवैजना झिनो मतान्तरमा अघिपछि रहनुभएको छ ।
पर्वतमा मतगणना जारी, कांग्रेसको अग्रता
प्रतिनिधि सभा तथा प्रदेश सभा निर्वाचनअन्तर्गत पर्वतको मतगणनामा जारी छ । पछिल्लो मतपरिणाम अनुसार गठबन्धनबाट उम्मेदवार बनेका नेपाली कांग्रेसका अर्जुन प्रसाद जोशीको अग्रता रहेको छ ।
रुकुम पश्चिममा मतगणना सुरु
रुकुमपश्चिममा मतगणना सुरु भएको छ । मंगलबार बिहानदेखि जिल्ला समन्वय समितिमा रहेको मुख्य निर्वाचन अधिकृतको कार्यालयमा मतगणना सुरु गरिएको हो ।
झापा-४ मा एमालेको अग्रता
झापा क्षेत्र नम्बर ४ मा राष्ट्रिय स्वतन्त्र पार्टीलाई पछि पार्दै नेकपा एमालेका लालप्रसाद साँवाले अग्रता बनाउनुभएको छ । एमालेका साँवाले चार हजार २०४ मत ल्याउँदा राष्ट्रिय स्वतन्त्र पार्टीका शम्भुप्रसाद ढकाल सुस्केराले चार हजार १७० मत ल्याएर पछ्याईरहनुभएको छ ।
पाँचथरमा कांग्रेसका आङदेम्बे अगाडि
हालसम्म आङदेम्वेले २२२० मत पाउनुभएको छ भने नेम्वाङले २०८५ मत पाउनुभएको छ ।
उदयपुरमा डा.खड्का रायमाझीको अग्रता
उदयपुरमा प्रतिनिधि सभा सदस्य तथा प्रदेश सभा सदस्य पदको मत गणना जारी रहेको छ ।
कैलालीका तीनवटा क्षेत्रमा नागरिक उन्मुक्तिको अग्रता
कैलालीका तीन वटा क्षेत्रमा नागरिक उन्मुक्ति पार्टीले अग्रता लिएको छ । प्रतिनिधि सभा क्षेत्र नम्बर २ को मतगणना पनि सुरु भएको छ ।
गुल्मी-२ मा एमालेका विष्टको अग्रता
गुल्मी निर्वाचन क्षेत्र नम्बर २ मा नेकपा एमालेका उम्मेदवार गोकर्ण राज विष्टको अग्रता कायमै रहेको छ । यस क्षेत्रको मतगणना सुरु भएदेखि अहिलेसम्म विष्टको अग्रता कायम रहेको हो ।
धरानमा राप्रपाको अग्रता
सुनसरी क्षेत्र नम्बर १ मा प्रतिनिधि सभातर्फको धरानको वडा नम्बर १ मा खसेको मत गणना सकिएको छ ।
लमजुङमा एमालेको अग्रता
लमजुङमा प्रतिनिधि सभा सदस्यमा नेकपा एमालेका पृथ्वीसुब्बा गुरुङकै अग्रता कायम छ । १७ हजार ९ सय २८ मतगणना गर्दा एमालेका गुरुङले ९ हजार १ सय ९ मत ल्याएका छन् । सत्ता गठबन्धनका उम्मेदवार नेकपा (माओवादी) केन्द्रका देवप्रसाद गुरुङले ७ हजार २०० मत पाएका छन् ।
म्याग्दीमा कांग्रेसका गर्बुजाकाे अग्रता
म्याग्दीको प्रतिनिधि सभा सदस्य पदमा सत्ता गठबन्धनका साझा उम्मेदवार नेपाली कांग्रेसका खमबहादुर गर्बुजाले ३ हजार ८ सय ७ मत प्राप्त गरी अग्रता हासिल गर्नुभएको छ ।
प्राकृतिक स्रोत नियमनको अधिकार सङ्घीय तहलाई
सर्वोच्च अदालतले ढुङ्गा, गिट्टीको उत्खनन र बिक्रीलाई सङ्घीय तहबाटै नियमन गरिनुपर्ने व्याख्या गरेको छ। कर सङ्कलनको अधिकार स्थानीय तहसँग भए पनि नियमनको अधिकार दिन उचित नहुने सर्वोच्चको व्याख्या छ। सरकारले आर्थिक वर्ष २०७८/७९ को बजेटमार्फत व्यापार घाटा न्यूनीकरणका लागि ढुङ्गा, गिट्टी निकासीको व्यवस्था गरेपछि सर्वोच्चमा रिट दायर गरिएका थिए। अदालतले निकासीसम्बन्धी उक्त व्यवस्था कार्यान्वयन नगर्न परमादेश जारी गरेको छ। ०७९ वैशाख ७ गतेको फैसलाको पूर्ण पाठ अदालतले हालै सार्वजनिक गरेको हो।
