वीरगञ्ज महानगर प्रमुखबाट सरावगीको राजीनामा
वीरगञ्ज महानगरपालिका प्रमुख विजयकुमार सरावगीले पदबाट राजीनामा दिनु भएको छ । वैशाख ३० गते हुने स्थानीय तहको निर्वाचनमा उम्मेदवार हुन सरावगीले सो पदबाट राजीनामा दिनुभएको हो ।
पालिका अध्यक्षसहित १४ को राजीनामा
वैशाख ३० मा हुने स्थानीय तह निर्वाचनमा पार्टीले टिकट दिने पक्का भएपछि उम्मेदवारी दिन जनप्रतिनिधिहरुले राजीनामा दिन थाल्नुभएको हो । जिल्लाका दुई पालिका अध्यक्ष, वडाअध्यक्षसहितका सदस्यहरुले राजीनामा दिनुभएको छ ।
उम्मेदवार हुन चाहने व्यक्तिको बन्दसूचीबाट नाम हटाउन आयोगको आग्रह
प्रतिनिधि सभा सदस्य निर्वाचन वा प्रदेश सभा सदस्य निर्वाचनको समानुपातिक निर्वाचन प्रणालीतर्पmको उम्मेदवारको बन्दसूचीमा नाम कायम रहेको व्यक्ति आगामी बैशाख ३० गते हुने स्थानीय तह निर्वाचनमा उम्मेदवार हुन चाहेमा वैशाख १० गते भित्र प्रक्रिया पु-याई बन्दसूचीबाट नाम हटाउन निर्वाचन आयोगले आग्रह गरेको छ ।
एमालेको निर्वाचन घोषणापत्र, शिक्षा र स्वास्थ्यलाई प्राथमिकता
नेकपा (एमाले)ले स्थानीय तह निर्वाचनका लागि घोषणापत्र सार्वजनिक गरेको छ । शुक्रबार पार्टी कार्यालय च्यासलमा आयोजित कार्यक्रममा एमालेका अध्यक्ष केपी शर्मा ओलीले वैशाख ३० गते हुने स्थानीय तह निर्वाचनका लागि घोषणापत्र सार्वजनिक गर्नुभएको हो ।
-original-thumb.jpg)
कैलालीमा ९१ जनाको सामूहिक राजीनामा
फूलबारी(कैलाली), वैशाख ९ गते । कैलालीमा स्थानीय तहको निर्वाचनमा गठबन्धन गर्ने निर्णयप्रति असन्तुष्टि जनाउँदै नेपाली काँग्रेसका वडा सभापतिसहित ९१ जना क्रियाशील सदस्यले सामूहिक राजीनामा दिएका छन् ।जिल्लाको धनगढी उपमहानगरपालिका–१८ का वडा सभापति भक्तबहादुर थापासहितका क्रियाशील सदस्यले शुक्रबार नगर सभापति यज्ञराज उपाध्यायलाई सामूहिक राजीनामा दिएका हुन् । ‘विगत लामो समयदेखि बलियो सङ्गठनका कारण नेपाली काँग्रेसको जित निश्चित भएको हुँदा वडा नम्बर १८ कमिटीका तर्फबाट उम्मेदवार नभएका कारण क्रियाशील सदस्यबाट राजीनामा दिँदै स्वतन्त्र उम्मेदवार उठाउने निर्णय गरेका छौँ,’ वडा सभापति भक्तबहादुर थापाले बताउनुभयो । सामूहिक राजीनामा दिनेहरुमा नेपाली काँग्रेस कैलालीका पूर्व जिल्ला सदस्य लक्ष्मीप्रसाद देवकोटा, पूर्व क्षेत्रीय उपसभापति कुम्भराज गिरी, पूर्व वडाध्यक्ष सालीभान खड्कालगायतका नेता कार्यकर्ता छन् । २०७४ सालमा भएको स्थानीय निर्वाचनमा उक्त वडा माओवादी केन्द्रले जितेका कारण भागबण्डाका क्रममा माओवादीले नै पाउने भएपछि काँग्रेसका नेता कार्यकर्ता असन्तुुष्ट बनेका थिए ।
म्याद सकिँदा बाँकेमा सात जनाले मात्र हतियार बुझाए
नेपालगञ्ज, वैशाख ९ गते । निर्वाचनको सुरक्षालाई ध्यानमा राखेर बाँके प्रशासनले लाइसेन्स लिएर राखेका हतियार तथा अवैध हतियार प्रहरीलाई बुझाउन दिएको निर्देशनलाई बेवास्ता गरिएको पाइएको छ । जिल्ला प्रशासन कार्यालय बाँकेले गत चैत १६ गते जनताले लाइसेन्स लिएर राखेका हतियार नजिकको प्रहरी एकाइ तथा जिल्ला प्रहरी कार्यालय बाँकेमा चैत मसान्तभित्र बुझाउन निर्देशन दिएको थियो । तर सो अवधिमा सात वटा मात्र हतियार प्रहरीमा जम्मा गरिएको जनाउँदै बाँकेका प्रमुख जिल्ला अधिकारी सूर्यबहादुर खत्रीले अधिकांशले प्रशासनको निर्देशन पालना नगरेको बताउनुभयो । उहाँले बाँकेबाट ५५५ जनाले हतियार राख्नका लागि अनुमति लिएको देखिएको जनाउँदै ७ वटा मात्र हतियार बुझाउनुले ती हतियार पनि निर्वाचनमा सुरक्षा चुनौती बन्न सक्ने आशङ्का व्यक्त गर्नुभयो । हतियार बुझाउने म्याद सकिए पनि अझै हतियार ल्याएमा बुझेर राख्ने तथा चुनाव सकिएलगत्तै फिर्ता गर्ने प्रजिअ खत्रीले बताउनुभयो । उहाँले हतियार बुझाउन सर्वसाधारणलाई फेरि पनि आग्रह गरिएको जनाउनुभयो । उता, जिल्ला प्रहरी कार्यालय बाँकेका प्रहरी प्रवक्ता डीएसपी मधुसुदन न्यौपानेले निर्वाचन सुरक्षाका लागि निजी हतियार प्रहरीलाई बुझाउनुपर्ने बताउनुभयो । उहाँले अहिलेसम्म ७ थान मात्र बाह्रबोर बन्दुक बुझाइएकाले अरुलाई पनि बुझाउन फेरि पनि आग्रह गरिएको बताउनुभयो । उहाँले अब प्रशासनबाट हतियार राख्नेहरुको लगत लिएर उनीहरुलाई सम्पर्क गरेर हतियार बुझाउन लगाउने तयारी गरिएको जनाउँदै त्यसपछि पनि नबुझाउनेलाई कारवाहीको दायरामा ल्याइने बताउनुभयो । खुला सीमानाका कारण हतियार सजिलै भित्र्याउन सकिने हुँदा लाइसेन्स भएका भन्दा बढी हतियार गैरकानुनी रुपले भारतबाट भित्र्याइएका पनि यहाँ रहेको हुनसक्ने प्रहरीको भनाइ छ । त्यस्ता हतियारलाई पटक पटक प्रहरीले पक्राउ पनि गर्दै आएको छ ।
-original-thumb.jpg)
फेरि उम्मेद्वार हुन वडा अध्यक्षबाट राजीनामा
नवीन शिशिरबागलुङ, वैशाख ९ गते । बागलुङ नगरपालिका–११ रायडाँडाका वडा अध्यक्ष ज्ञानेन्द्र गौतमले आफ्नो पदबाट राजिनामा दिनुभएको छ । आसन्न स्थानीय तह निर्वाचनमा नेपाली काँग्रेस गाउँ पार्टी समितिले वडा अध्यक्षको उम्मेवारको रुपमा गौतमलाई पुनः सिफारिस गरेपछि गौतमले पदबाट राजीनामा दिनुभएको हो । गौतमले नगरपालिकाका योजना तथा प्रशासकीय अधिकृत युक्तप्रसाद सुवेदीमार्फत नगरप्रमुख जनकराज पौडेलललाई राजीनामा बुझाउनुभएको छ । गौतम पार्टीले उम्मेदवारको रुपमा नाम सिफारिस गरेपछि पदबाट राजीनामा दिनुभएको छ । स्थानीय तहको निर्वाचन नजिकिँदै जाँदा जनताको चाहना अनुसार पार्टीले पनि आफूलाई पुन उम्मेदवारीको रुपमा सिफारिस गरेको हुँदा पदिय दायित्वबाट राजिनामा दिएका गौतमले प्रतिक्रिया दिनुभयो । गठबन्धनबाट वडाध्यक्षमा सर्वसम्मत उम्मेदवार बन्ने सहमति बनेपछि राजीनामा बुझाउनुभएको हो । विस २०७४ को स्थानीय निर्वाचनमा गौतम नेपाली काँग्रेसको तर्फबाट वडा अध्यक्षमा विजयी हुनुभएको थियो । बानपा–११ मा नेपाली काँग्रेसको राम्रो जनमत भएको ठाउँ हो । गौतम लामो समय सञ्चारक्षेत्रका कार्यरत हुनुहुन्थ्यो । नगरपालिकाको सबैभन्दा दुर्गम मानिने रायडाडाको थप विकासको लागि दोहोरिने आफू फेरि पनि नेतृत्व लिन तयार भएको गौतमको भनाइ छ । गौतमले पेश गरेको राजिनामा पत्र नगरप्रमुख जनकराज पौडेल समक्ष पेश गरेको योजना तथा प्रशासकीय अधिकृत युक्तप्रसाद सुवेदीले जानकारी दिनुभयो ।
राप्रपाले सिद्धार्थनगरको प्रमुखमा सागरप्रताप राणालाई उम्मेदवार बनाउने
राष्ट्रिय प्रजातन्त्र पार्टी (राप्रपा)ले सागर प्रताप राणालाई सिद्धार्थनगर नगरपालिकाको प्रमुखको उम्मेदवार बनाउने घोषणा गरेको छ । पार्टीको रुपन्देही जिल्ला अध्यक्ष समेत रहेका राणालाई प्रमुख बनाउने घोषणा गरेको हो ।
खडक नगरपालिकामा नेकपा माओवादी केन्द्र र नेकपा एसबीच चुनावी गठबन्धन
सप्तरी, वैशाख ९ गते । स्थानीय तह निर्वाचनको लागि सप्तरीको खडक नगरपालिकामा नेपाल कम्युनिष्ट पार्टी(माओवादी केन्द्र) र नेपाल कम्युनिष्ट पार्टी (एकीकृत समाजवादी)बीच गठबन्धन भएको छ । सत्ता साझेदार ५ दलले गठबन्धन बनाउने सहमतिअनुसार खडक नगरपालिकामा यी दुई पार्टीबीच गठबन्धन गरिएको हो । परिवर्तन विरोधी शक्तिहरु सक्रिय भइरहेको अवस्थामा देशको परिस्थितिअनुसार आगामी वैशाख ३० गते हुने स्थानीय तह निर्वाचनमा जिल्ला जिल्लामा स्थानीय तहलाई परिवर्तनकारी पार्टीहरु मिलेर बनेको महागठबन्धनको भावनाअनुसार सप्तरी जिल्लाको खडक नगरपालिकामा यी दुई पार्टीबीच तालमेल भएको हो ।तालमेलअनुसार नेपाल कम्युनिष्ट पार्टी (माओवादी केन्द्र)बाट नगर प्रमुखमा जयप्रकाश चौधरी र नेपाल कम्युनिष्ट पार्टी (एकिकृत समाजवादी)को तर्फबाट नगर उपप्रमुखमा शत्रुघन प्रसाद साह (आजाद) लाई अघि सार्ने सहमति भएको व्यहोरा दुई पार्टीका नगर अध्यक्षद्धारा जारी गरिएको विज्ञप्तिमा उल्लेख छ ।सहमतिअनुसार नेकपा (माओवादी केन्द्र)बाट वडा नम्बर १, २, ६, ८ र १० तथा नेकपा (एकीकृत समाजवादी)ले वडा नम्बर ४, ५, ७, १० र ११ मा वडा अध्यक्षको उम्मेदवारी दिने निर्णय भएको छ ।सहमति हुन नसकेका वडा नम्बर ३ र ९ मा छुट्टाछुट्टै रुपमा उम्मेदवारी दिने निर्णय भएको छ ।
उम्मेदवार बन्न गाउँपालिका अध्यक्षबाट राजीनामा, सबै पालिकामा निर्वाचन कार्यालय खुल्यो
पाल्पा, वैशाख ९ गते । तिनाउ गाउँपालिका वडा नं. २ का वडा अध्यक्ष एवम् गाउँपालिकाका प्रवक्ता राजेश श्रेष्ठले पदबाट राजीनामा दिनुभएको छ । आगामी निर्वाचनमा उम्मेदवार बन्न लागेको जानकारी दिनुहुँदै वडा अध्यक्ष श्रेष्ठले राजीनामा दिएको बताउनुभएको छ । पाल्पामा बहालवाला जनप्रतिनिधिमध्ये पहिलो पटक श्रेष्ठले नै राजीनामा दिनुभएको हो ।निर्वाचनसम्बन्धी ऐनले सरकारी सेवासुविधा लिएका बहालवाला जनप्रतिनिधिले निर्वाचनमा उम्मेदवार बन्न नपाउने प्रावधानका कारण आफूले राजीनामा दिएको उहाँले बताउनुभयो । गाउँपालिकाका अध्यक्ष ओमबहादुर घर्तीमगरलाई श्रेष्ठले राजीनामा बुझाउनुभएको हो । श्रेष्ठ नेकपा माओवादी केन्द्रबाट तिनाउ गाउँपालिकाको अध्यक्ष पदमा चुनाव लड्ने पक्कापक्की भएको छ । वि.स. २०७४ सालको स्थानीय तहको निर्वाचनपछि आफूले पदमा रहँदा जनताको विश्वास जितेर काम गरेको उहाँले दाबी गर्नुभयो । पाल्पाका दश वटै स्थानीय तहमा निर्वाचन अधिकृतको कार्यालय सञ्चालनमायसैबीच, पाल्पाका दश वटै स्थानीय तहमा निर्वाचन अधिकृतको कार्यालय सञ्चालनमा आएको छ । सदरमुकाम तानसेनमा मुख्य निर्वाचन अधिकृतको कार्यालयसहित जिल्लाभर अन्य पालिकामा निर्वाचन अधिकृतको कार्यालय सञ्चालनमा आएको हो । आगामी २०७९ वैशाख ३० गते हुने स्थानीय तहको निर्वाचन भयरहित, निष्पक्ष र स्वतन्त्र रुपमा सम्पन्न गर्न जिल्लाभर निर्वाचन अधिकृतको कार्यालय खुलेको हो । तानसेनमा मुख्य निर्वाचन अधिकृतको कार्यालय उद्घाटन कार्यक्रममा मुख्य निर्वाचन अधिकृत एवं जिल्ला न्यायाधीश खड्गबहादुर केसीको स्थानीय तहको निर्वाचन सम्पन्न गर्न सबैको सहयोग आवश्यक रहेकोमा जोड दिनुभयो । निर्वाचनमा सहभागी सबै राजनैतिक दल, मतदाता, पत्रकार, नागरिक समाज सबैको आपसी सहयोगमा निर्वाचन निष्पक्ष रुपमा सम्पन्न हुने मुख्य निर्वाचन अधिकृत केसीले बताउनुभयो । ‘निर्वाचन स्वतन्त्र र निष्पक्ष रुपमा सम्पन्न गर्न सबैको सहयोग आवश्यक छ, उहाँले भन्नुभयो ।’ पाल्पाको दश वटै स्थानीय तहमा बिहीबार निर्वाचन अधिकृतको कार्यालय खुलेको जिल्ला निर्वाचन अधिकारी रुक्मागत अर्यालले जानकारी दिनुभयो । पालिकासँगको समन्वयमा सबै पालिकामा निर्वाचन अधिकृतको कार्यालय सञ्चालनमा आएको उहाँले बताउनुभयो । पाल्पामा खटिनुभएका निर्वाचन अधिकृतहरू सम्बन्धित पालिकामा पुगेर काम सुरु गरिसकेको निर्वाचन अधिकारी अर्यालले जानकारी दिनुभयो ।जिल्लाको निस्दीको मित्याल, रम्भाको रम्भा, माथागढीको झडेवा, तिनाउको दोभान, रामपुरको रामपुर, बगनासकालीको चिर्तुङ्धारा, पूर्वखोलाको रिङ्नेरह, रिब्दीकोटको खस्यौली, रैनादेवी छहराको छहरामा निर्वाचन अधिकृतको कार्यालय स्थापना भएकाे छ ।
गठवन्धन विरोधी कुनैपनि गतिविधि नगर्न चितवन काँग्रेसको निर्देशन
शालिग्राम नेपाल चितवन, वैशाख ९ गते । नेपाली काँग्रेस चितवनले गठवन्धनको मर्म विपरित कुनैपनि गतिविधि नगर्न पार्टीका कार्यकर्तालाई आग्रह गरेको छ । गठवन्धनको विपक्षमा उत्रेका जिल्लाका नेता तथा कार्यकर्तालाई पार्टीको केन्द्रीय निर्णय अनुसार जिल्लामा पक्षमा वातावरण मिलाउन अनुरोध गरिएको हो । जिल्ला सभापति राजेश्वर खनालले शुक्रबार जारी गर्नु भएको विज्ञप्तिमा भनिएको छ ‘केन्द्रिय परिपत्र भन्दा बाहिर गएर कुनै भेला, छलफल, गोष्ठी नगर्न र नगराउनका लागि पार्टीका सबै तह र तप्काका नेता तथा कार्यकर्ताहरुलाइ आग्रह गर्दछु ।’ बैशाख ३० गते हुने स्थानीय निर्वाचनमा सबै पार्टीहरु होमिएको अवस्था र नेपाली कांग्रेसले गठबन्धनलाई आत्मसाथ गर्दछ भनिएको छ । विज्ञप्तिमा केन्द्रको निर्देशन अनुसार अगाडि बढेन कुरालाइ ध्यानाकर्षण गर्दै नेपाली कांग्रेसको केन्द्रीय परिपत्र अनुसार चितवनमा गठबन्धनलाई पूर्ण पालना गरि अगाडि बढ्ने कुराको समेत जानकारी गराउन चाहन्छु बिज्ञप्ति भनिएको छ । भरतपुर महानगरपालिका भागण्डामा माओवादी केन्द्रलाई दिने पार्टी केन्द्रको निर्णयपछि जिल्लामा असन्तुष्टी भएको थियो । गत निर्वाचनमा पनि माओवादीलाई दिएको र यस पटक आफूले पाउनु पर्छ भन्दै जिल्ला सभापति सहित केन्द्रीय सदस्यहरु पार्टी सभापतिको ध्यानाकर्षण गराएका थिए । तर केन्द्रीय सभापति शेरवहादुर देउवाले भरतपुर महानगर माओवादीलाई दिएपछि जिल्लामा गठवन्धन विरोधी कार्य हुदै आएको थियो । जिल्लामा अहिले गठवन्धनका दलहरु बिच पालिका वाँडफाँडको विषयमा छलफल चलिराखेको छ । प्रारम्भिक छलफलमा जिल्लाको सातवटा पालिका मध्य भरतपुरमा प्रमुख माओवादी, उपप्रमुख काँग्रेस, माडी नगरपालिका माओवादी, रत्ननगर नगरपालिका काँग्रेस, कालिका नगरपालिका काँग्रेस, राप्ती नगरपालिका नेकपा एकीकृत समाजवादी, खैरहनी नगरपालिका काँग्रेसलाई दिने तयारी रहेको छ । इच्छाकामना गाउपालिका माओवादी केन्द्रले दावी गरेको छ भने २०७४ को निर्वाचनमा काँग्रेस विजयी भएको थियो ।
आचारसंहितामा पालना गर्न सबै दल प्रतिबद्ध
रुकुम पश्चिम, वैशाख ९ गते । रुकुम पश्चिमका राजनितीक दलहरुले बैशाख ३० गते हुने स्थानीय तह निर्वाचन सम्बन्धिका आचारसंहिता पालना गर्ने प्रतिबद्धता जनाएका छन् । दलहरू चुनावमा निर्वाचन आयोगले बनाएका आचारसंहिता पूर्ण रूपमा पालना गर्न प्रतिबद्ध भएका हुन् । मुसिकोट स्थित मुख्य निर्वाचन अधिकृतको कार्यालयमा आयोजित अन्तरक्रिया कार्यक्रममा जिल्लास्थित सबै क्रियासिल राजनीतिक दलहरूले निर्वाचन आचारसंहिता पालना गर्न एकमत भएको बताइएको छ । रुकुम जिल्ला अदालतका न्यायाधीश तथा मुख्य निर्वाचन अधिकृत विद्याराज पौडेलले आचारसंहिता पालना गर्ने र गराउन सबै दलहरु प्रतिबद्ध भएको बताउनुभयो । छलफल कार्यक्रममा उहाँले सबै सरोकारावालाले आचारसंहितामा पालना गर्यौँ भने उल्लङ्घन हुने सम्भावना नै रहन्न भन्नुहुँदै राजनीतिक दल र सन्चारमाध्यमले आचारसंहिता पालना गर्नु कर्तव्य भएको बताउनुभयो । कार्यक्रममा आचारसंहितको कानुनी आधार, उद्देश्य, लागू हुने निकाय, राजनीतिक दलदेखि सञ्चारमाध्यम सबैले पालना गर्नुपर्ने आचरसंहिता, निर्वाचन खर्च, मौन अवधि, मतदान तथा मतगणनाका बेला पालना गर्नुपर्ने आचरण, आचारसंहिता अनुगमन तथा त्यसका अन्य व्यवस्था, राजनीतिक दल र उम्मेदवारको भूमिका, निर्वाचनसम्बन्धी कार्यक्रम, मनोनयन दाखिला, उम्मेदवारको धरौटीलगायतका विषयमा छलफल भएको थियो । निर्वाचनको लागि रुकुम पश्चिममा सात दल दर्ता भएका छन् ।
स्याङ्जाका ७३ मतदान केन्द्र अतिसंवेदनशील सूचीमा
स्याङ्जाका ७३ मतदान केन्द्र सुरक्षाका दृष्टिले अतिसंवेदनशील केन्द्रको सूचीमा परेका छन् । स्थानीय तह निर्वाचन नजिकिँदै जाँदा जिल्लास्थित सुरक्षा समिति स्याङ्जाले जिल्लाका मतदान केन्द्रको वर्गीकरण गरेको हो । अतिसंवेदनशील, संवेदनशील र सामान्य संवेदनशील मतदान केन्द्रका रूपमा जिल्लाका मतदान केन्द्रलाई वर्गीकरण गरिएको छ । जिल्लाका १९९ मतदान केन्द्रमध्ये ७३ मतदान केन्द्र अतिसंवेदनशील सूचीमा परेका छन् । त्यस्तै, ७३ मतदान केन्द्र संवेदनशील र ५३ मतदान केन्द्र सामान्य रहेका छन् ।
वृद्धाश्रमका नागरिक मतदानबाट वञ्चित
स्थानीय तहको निर्वाचन आउन २१ दिन बाँकी छ । निर्वाचनमा १८ वर्षभन्दा माथिका सबै नागरिक मतदाता रहनुपर्नेमा वृद्धाश्रममा रहेका ज्येष्ठ नागरिकहरू मतदान गर्नबाट वञ्चित हुनुहुनेभएको छ । वृद्धाश्रममा रहेका ज्येष्ठ नागरिकको मतदाता नामावलीमा नाम नरहेको र केहीको मतदाता परिचयपत्र नै नबनेको हुँदा उहाँहरू मतदानबाट वञ्चित हुने अवस्था आएको हो । पशुपति क्षेत्रमा रहेको सरकारी वृद्वाश्रममा रहेका ज्येष्ठ नागरिकको मतदा
अध्यक्षको जिम्मा अव सचिवलाई
काठमाडौं, बैसाख ९ गते । यही वैशाख ३० गते हुन गइरहेको स्थानीय तह निर्वाचनका लागि बहालवाला जनप्रतिनिधिले पुनः उम्मेदवार बन्न चाहेमा राजीनामा दिनुपर्ने कानुनी मान्यताअनुसार वडा सचिवले कार्यवाहक अध्यक्षको हैसियतमा काम गर्न पाउने भएका छन् ।काठमाडौँ महानगरपालिकाको ७५औँ कार्यपालिका बैठकले स्थानीय तह निर्वाचन, २०७९ मा बहालवाला जनप्रतिनिधिले उम्मेदवार बन्न राजीनामा दिनुपर्ने अहिलेको अवस्थामा वडाध्यक्षसहित सबै सदस्यले राजीनामा दिएमा वडा सचिवले कार्यवाहक अध्यक्षको हैसियतमा काम गर्ने निर्णय गरेको हो । यही व्यवस्थाबमोजिम बिहीबारको कार्यपालिका बैठकले वडाध्यक्षले राजीनामा दिए वडा सदस्यमध्येबाट एक जनालाई कार्यवाहक दिने निर्णय गरेको छ । यदि वडाका सबै जनप्रतिनिधिले राजीनामा दिएमा वडा सचिवलाई कार्यवाहक अध्यक्षको हैसियतमा काम गर्न अधिकार दिने निर्णय भएको छ ।स्थानीय सरकार सञ्चालन ऐनको दफा ११६ मा कार्यवाहक भई काम गर्ने अवस्थासम्बन्धी व्यवस्था छ । जसमा वडाध्यक्षले राजीनामा दिए, वडा सदस्यमध्येबाट कार्यवाहक दिन सकिन्छ । सबै जनप्रतिनिधिले राजीनामा दिए कार्यवाहक अध्यक्षका विषयमा कार्यपालिकाको बैठकले निर्णय गर्न सक्छ ।त्यसैगरी बैठकले नन्दीरात्रि माध्यमिक विद्यालय नक्सालमा राजेश हुमागाईँ र महेन्द्र बौद्ध माध्यमिक विद्यालयमा धर्मेन्द्र खकुरेललाई प्रधानाध्यापकमा गरिएको नियुक्तिलाई अनुमोदन गरेको छ ।
स्थानीय तह निर्वाचन प्रक्रिया तीव्र
निर्वाचन आयोगले स्थानीय तह निर्वाचन, २०७९ का लागि सबै स्थानीय तहमा निर्वाचन अधिकृतको कार्यालय स्थापना गरेको छ । बिहीबार देशभरका ७५३ स्थानीय तहमा मुख्य निर्वाचन अधिकृत र निर्वाचन अधिकृतको कार्यालय स्थापना भएको आयोगले जनाएको छ ।
लमजुङमा मुख्य निर्वाचन अधिकृतको कार्यालय स्थापना
बेलिना थापालमजुङ, बैशाख ८ गते । बैशाख ३० गते हुने स्थानीय तह निर्वाचन २०७९ लाई लक्षित गरी लमजुङमा मुख्य निर्वाचन अधिकृतको कार्यालय स्थापना गरिएको छ । निर्वाचन प्रक्रिया अघि बढाउन बिहीबार जिल्ला समन्वय समिति लमजुङको भवनमा कार्यालय स्थापना गरिएको हो ।भवनको एउटा कोठामा कार्यालय स्थापना गरिएको जिल्ला निर्वाचन अधिकारी सिर्जना मिश्रले बताउनुभयो । उहाँकाअनुसार बोर्ड राखेर कार्यालय स्थापना भएको छ । मुख्य निर्वाचन अधिकृत जिल्ला अदालत लमजुङका जिल्ला न्यायाधीश शिवप्रसाद खनालले बोर्ड पढेर कार्यालयको सुभारम्भ गर्नुभयो । अब कार्यालयबाट नियमित दैनिक रुपमा चुनावी कार्यक्रमका लागि काम थाल्ने उहाँले बताउनुभयो । कार्यालयमा मुख्य निर्वाचन अधिकृत एक जना, सहायक निर्वाचन अधिकृत एक जना, लेखापाल वा लेखा अधिकृत एक जना, सहायक कर्मचारी एक जना, कम्प्युटर अपरेटर एक जना, कार्यालय सहयोगी एक जना, चालक एक जना, सुरक्षाकर्मी एक जना गरी नौ जना कर्मचारी रहनेछन् । कर्मचारीलाई नियुक्तीको प्रक्रिया अघि बढाउने उहाँले बताउनुभयो । मुख्य निर्वाचन अधिकृतको कार्यालयले जिल्लाभरको निर्वाचन क्रियाकलापको समन्वय गर्नेछ । यस्तै, बेंसीशहर नगरपालिकाको निर्वाचनलाई लक्षित गरेर काम गर्ने सो कार्यालयले जनाएको छ । मुख्य निर्वाचन अधिकृतको कार्यालयसँगै अन्य ७ वटा पालिकामा पनि निर्वाचन अधिकृतको कार्यालय स्थापना भएको जिल्ला निर्वाचन कार्यालयले जनाएको छ । अन्य पालिकामा निर्वाचन अधिृकत एक जना, सहायक निर्वाचन अधिकृत एक जना, लेखापाल वा लेखा अधिकृत एक जना, सहायक कर्मचारी एक जना, कम्प्युटर अपरेटर एक जना, कार्यालय सहयोगी दुई जना, चालक एक जना, सुरक्षाकर्मी एक जनागरी नौ जना कर्मचारी खटिनेछन् । निर्वाचन कार्यालयकाअनुसार निर्वाचन अधिकृतको कार्यालयमा बैशाख ११ गते विहान १० बजेदेखि बेलुका ५ बजेसम्म उम्मेदवारको मनोनयनपत्र दर्ता गर्ने कार्य हुनेछ । बैशाख १२ गते बेलुका ५ बजेदेखि ६ बजेसम्म मनोनयनपत्र दर्ता भएको उम्मेदवारको सूचि प्रकाशन गर्ने, बैशाख १३ गते विहान १० बजेदेखि बेलुका ५ बजेसम्म उम्मेदवारको विरोधमा उजुरी दिने, बैशाख १४ गते विहान १० बजेबाट बैशाख १५ गते बेलुका ५ बजेसम्म मनोनयनपत्र जाँच गर्ने र उजुरीउपर जाँचबुझ गरी निर्णय गरिने जनाएको छ । बैशाख १५ गते बेलुका ५ बजेदेखि ६ बजेसम्म मनोनयन भएको उम्मेदवारको नामावली प्रकाशन गर्ने, बैशाख १६ गते विहान १० बजेदेखि बुलका ५ बजेसम्म उम्मेदवारको नाम फिर्ता लिने, बैशाख १६ गते बेलुका ५ बजेदेखि ६ बजेसम्म उम्मेदवारको अन्तिम नामावली प्रकाशन गरिनेछ । त्यस्तै, बैशाख १७ गते विहान १० बजेदेखि ५ बजेसम्म उमेदवारलाई निर्वाचन चिन्ह प्रदान गर्ने कार्यक्रम छ । बैशाख ३० गते विहान ७ बजेदेखि बेलुका ५ बजेसम्म मतदान केन्द्रमा मतदान कार्य हुने सो कार्यालयले जनाएको छ । निर्वाचनको मौन अवधि मतदान सुरु हुनुभन्दा ४८ घण्टा अगाडि बैशाख २७ गते राति १२ बजेबाट लागू हुनेछ । प्रत्येक मतदान केन्द्रमा मतदान भएका सबै मतपेटिका मतदान अधिकृतबाट निर्वाचन अधिकृतले सुरक्षित रुपमा प्राप्त गरेपछि मतगणना कार्य सुरु गर्नु पर्नेछ । मतगणना कार्य समाप्त भएपछि निर्वाचन अधिकृतले तत्काल निर्वाचन परिणाम घोषणा गर्नुपर्नेछ ।
-original-thumb.jpg)
५३ जिल्लाका एक करोड १९ लाख मतपत्र छापियो
निर्वाचन आयोगले ५३ जिल्लाका लागि मतपत्र छाप्ने काम सकिएको जनाएको छ । आयोगले निर्वाचनका लागि बिहीबारसम्म ५३ जिल्लाका लागि एक करोड १९ लाख मतपत्र छाप्ने काम सकिएको जनाएको हो ।
केन्द्रीय सुरक्षा समितिमा स्थानीय निर्वाचनको तयारीबारे छलफल
केन्द्रीय सुरक्षा समिति बैठक गृहमन्त्री बालकृष्ण खाणको अध्यक्षमा सिंहदरबारमा बस्यो । बैठकमा स्थानीय तह निर्वाचनमा सुरक्षा प्रबन्धबारे छलफल भएको छ । गृह मन्त्रालयका प्रवक्ता फणिन्द्रमणि पोखरेलले बैठकमा ३० वैशाखमा हुने तय भएको स्थानीय निर्वाचन स्वच्छ, निष्पक्ष र धाधलीरहित बनाउन अपनाउने रणनीतिबारे कुराकानी भएको जानकारी दिनुभयो ।
७५३ स्थानीय तहमा निर्वाचन अधिकृतको कार्यालय स्थापना
निर्वाचन आयोगले आज विहिबार मुलुकका ७५३ स्थानीय तहमा निर्वाचन अधिकृतको कार्यालय औपचारिक रुपमा स्थापना गरेको छ । ७७ जिल्लामा मुख्य निर्वाचन अधिकृत र ६७६ वटा स्थानीय तहमा निर्वाचन अधिकृतको कार्यालय स्थापना गरिएको हो ।
काठमाडौंमा मुख्य निर्वाचन अधिकृतको कार्यालय स्थापना
भृकुटीमण्डपस्थित राष्ट्रियसभा गृहमा काठमाडौं जिल्लाको मुख्य निर्वाचन अधिकृतको कार्यालय स्थापना भएको छ । मुख्य निर्वाचन अधिकृत राजुकुमार खतिवडा र प्रमुख जिल्ला अधिकारी गोविन्दप्रसाद रिजालले बिहीबार सो कार्यालयको उद्घाटन गर्नुभएको हो ।
पाँचै दलका शीर्ष नेताले सम्बोधन गर्ने
सत्तारुढ गठबन्धनले सातै प्रदेशमा चुनावी सभा गर्ने भएको छ । वैशाख १८ देखि २२ गतेसम्म सातै प्रदेशमा गठबन्धनले चुनावी सभा गर्ने निर्णय गरेको हो ।
आकाङ्क्षी धेरै हुँदा मतदानबाट उम्मेदवार सिफारिस
सिन्धुपाल्चोक, वैशाख ८ गते । वैशाख ३० गते हुने स्थानीय तह निर्वाचनमा स्थानीय तहमा उम्मेदवारका आकाङ्क्षी धेरै भएपछि मतदानबाट उम्मेदवार चयन गरी सिफारिस गरिएको छ । सुनकोशी गाउँपालिकामा नेपाली काँगे्रसबाट अध्यक्षको आकाङ्क्षी आधा दर्जन पुगेपछि मतदानबाट अध्यक्षका उम्मेदवार चयन गरी माथिल्लो तहमा सिफारिस गरिएको छ । मतदानबाट सुनकोशी गाउँपालिका सभापति रुपकाजी लामाले २७ मत ल्याई पहिलो नम्बरमा पर्नुभएको छ भने वडा नम्बरका १ का बर्तमान वडाअध्यक्ष नेत्र कार्कीले १७ मत पाउनुभएको छ । अध्यक्षमा सात जना आकाङ्क्षी थिए । त्यस्तै उपाध्यक्षमा कान्छीमाया लामाले २० मत, ज्ञानु तिमल्सिनाले १९ मत र अम्बिका तिमल्सिनाले १५ मत प्राप्त गर्नुभएको छ । अध्यक्षमा बढी मत ल्याउनुहुनेको नाम जिल्ला कार्यसमितिमा सिफारिस गरिएको जनाएको छ । निर्वाचनमा अन्य दल भने सर्वसम्मत रुपमा उम्मेदवार चयन गर्ने प्रयासमा छन् ।
प्रतिबन्धित निर्वाचन सामग्री वितरण बन्द गर्न आग्रह
गोरखापत्र अनलाइनकाठमाडौं, वैशाख ७ गते । निर्वाचन आयोगले राजनीतिक दल र उम्मेदवारको निर्वाचन चिन्ह अङ्कित ज्याकेट, कमिज, भेष्ट, टिसर्ट, टोपी वा क्याप, गम्छा, मास्क, लकेट वा अन्य कुनै किसिमको पहिरन वा स्टीकर, लोगो, झोला, व्याच, ट्याटुजस्ता साङ्केतिक प्रचार प्रसार सामग्री उत्पादन तथा विक्री वितरण गर्ने कार्य तत्काल बन्द गर्न सम्बद्ध सबैमा आव्हान गरेको छ । आयोगले बुधबार विज्ञप्ति जारी गर्दै सो आव्हान गरेको हो । आयोगद्वारा जारी विज्ञप्तिमा भनिएको छ, “आचारसंहिताको दफा ४ को (घ) मा राजनीतिक दल वा उम्मेदवारको निर्वाचन चिन्ह अङ्कित ज्याकेट, कमिज, भेष्ट, टि–सर्ट, टोपी वा क्याम्प, गम्छा, मास्क, लकेट, वा अन्य कुनै किसिमको पहिरन वा स्टीकर, लोगो, झोला, ब्याच, ट्याटुजस्ता साङ्केतिक सामग्री उत्पादन गर्न, प्रयोग गर्न, बिक्री वितरण गर्न वा प्रदर्शन गर्न वा गराउन नहुने व्यवस्था रहेको छ ।”राजनीतिक दल तथा उम्मेदवारद्वारा प्रचार सामग्री उत्पादन तथा बिक्री वितरण भइरहेको भन्ने आयोगलाई सूचना प्राप्त भएकाले त्यस्ता सामग्री उत्पादन तथा बिक्री वितरण गर्ने कार्य तत्काल बन्द गर्न आयोगले सम्बद्ध सबैलाई आव्हान गरेको हो । विज्ञप्तिमा अगाडि भनिएको छ, “नेपाल उद्योग वाणिज्य महासंघ, नेपाल उद्योग परिसंघ र नेपाल चेम्बर्स अफ कमर्शलाई आफ्नो संरचना मातहतका उद्योग र फर्मलाई त्यस किसिमका कुनैपनि उत्पादन नगर्न नगराउन परिपत्र गरी सहयोग गरी दिन आयोग अनुरोध गर्दछ ।”आयोगको अनुरोधलाई बेवास्ता गरी आचारसंहिताको उल्लङ्घन भएमा निर्वाचन आयोग ऐन, २०७३ को दफा २३ बमोजिम आचारसंहिताको उल्लङ्घन गर्ने राजनीतिक दल, उम्मेदवार, व्यक्ति, संस्था, पदाधिकारी वा निकायलाई आयोगले कानुनी कारवाही गर्ने चेतावनी दिएको छ । आयोगले एक लाख रुपियाँसम्म जरिवाना गर्न सक्ने कानूनी व्यवस्था छ ।निर्वाचन आचारसंहिताको पूर्ण पालनाका लागि गैरसरकारी वा निजी संस्थासँग सम्बद्ध पदाधिकारी तथा कर्मचारीलाई त्यस्ता सामग्री उत्पादन, बिक्री वितरण नगर्न नगराउन र राजनीतिक दल, दलका उम्मेदवार, दलका भातृ संगठन, कार्यकर्ता एवम् सम्बद्ध सबैलाई त्यस्ता सामग्री उपयोग एवम् खरिद समेत नगर्न नगराउन निर्वाचन आयोगले स्मरण गराएको आयोगका प्रवक्ता शालिग्राम शर्मा पौडेलले बताउनुभयो ।
आचारसंहिता प्रतिकुल हुने समाचार सम्प्रेषण नगर्न निर्देशन
लक्की चौधरीकाठमाडौं, वैशाख ७ गते । निर्वाचनसम्बन्धी मिडिया अनुगमनको जिम्मेवारी पाएको प्रेस काउन्सिल नेपालले आचारसंहिता उल्लङ्घनको घटना अनुगमनमा तिव्रता दिएको छ । काउन्सिलले आचारसंहिता कार्यान्वयनमा सचेत गराउँदै उल्लङ्घन गर्नेलाई कारवाहीको प्रक्रिया पनि अगाडि बढाउँदैआएको छ । काउन्सिलले गत सोमबार रिपब्लिका दैनिक डट कम, काठमाडौंलाई आचारसंहिता पालनामा सजग गराएको छ । काउन्सिलका अनुगमन अधिकृत सुरेन्द्र मल्लकाअनुसार सो मिडियाले वैशाख १ गते ‘ललितपुरमा चिरिबाबु र भरतपुरमा रेणुको हार पक्का, टिकट लिन ठूलो चलखेल, कार्यकर्ताले धुलो चटाउने’ शीर्षकमा समाचार प्रकाशन गरेको थियो । समाचारले व्यक्तिगत प्रतिष्ठामा आँच पु¥याउने, भेदभाव हुने किसिमिले तथ्यहिन समाचार प्रकाशन गरेकोभन्दै आयोगले सो मिडियालाई सजग गराएको अनुगमन अधिकृत मल्लले बताउनुभयो । सो सञ्चारगृहलाई लिखित पत्राचार गरी पुनः त्यस्तो गल्ती नदोहो¥याउन सचेत गराएको काउन्सिलले जनाएको छ । त्यस्तै, काउन्सिलले गत सोमबार नै कालिका एफ.एम. ९५.२ मेघाहर्ज भरतपुर चितवनलाई पनि आचारसंहिता कार्यान्वयनमा सचेत गराएको छ । अनुगमन अधिकृत मल्लकाअनुसार सो एफएमले वैशाख २ गते चितवनमा भएको राप्रपाको कार्यक्रम दिउँसो १२ बजेदेखि साँझ ६ बजेसम्म लाइभ प्रशारण गरेको थियो । कुनै दलविशेष राजनीतिक दलको चुनावी सभाको पक्षपोषण हुनेगरी प्रशारण गर्दा आचारसंहिताको उल्लङ्घन हुने भन्दै काउन्सिलले आचारसंहिता पालनामा सो मिडिया गृहलाई लिखित पत्रमार्फत् सजग गराएको जनाएको छ ।सोहीअनुसार काउन्सिलले मंगलबार मकालु खबर डट कमलाई फोनमार्फत आचारसंहिता कार्यान्वयनका लागि सजग गराएको जनाएको छ । काउन्सिलका उपप्रशासकीय अधिकृत रामशरण बोहराकाअनुसार सो सञ्चार माध्यमले ‘एमालेलाई निर्वाचन आयुक्तको जवाफः आदरणीय व्यक्तित्वहरुलाई कद नघटाउन अनुरोध छ’ शीर्षकको समाचार सम्प्रेषण गरेको थियो । आचारसंहिता प्रतिकुल समाचार प्रकाशन भएलगत्तै सो मिडियाका प्रतिनिधिलाई फोनमार्फत समाचार करेक्सनका लागि अनुरोध भएपछि समाचार करेक्सन भएको काउन्सिलले जनाएको छ । त्यस्तै, गत सोमबार नै काउन्सिलले सन्ध्याकालिन दैनिक काठमाडौंलाई आचारसंहिता कार्यान्वयनका लागि निर्देश गरेको छ । सो पत्रिकाले ‘देशभर निर्वाचन वहिष्कारको पोष्टर टाँसियो’ शीर्षकमा समाचार सम्प्रेषण गरेको थियो । निर्वाचन विरोधी गतिविधिलाई प्रोत्साहन हुने किसिमको सामग्री प्रकाशन भएकोप्रति आयोगले आफ्नो गम्भीर ध्यानाकर्षण भएको जनाउँदै आइन्दा त्यस्तो विषयवस्तुको समाचार प्रकाशन प्रशारण नगर्न नगराउन सो सञ्चार गृहका सञ्चालकलाई लिखित निर्देश गरेको अनुगमन अधिकृत मल्लले बताउनुभयो । सोहीअनुसार नोपाटी डट कम डिजिटल न्यूज पोर्टललाई नेपालभित्र सम्प्रेषण हुन नसक्नेगरी व्यवस्था गर्न काउन्सिलले नेपाल दूरसञ्चार प्राधिकरणलाई लिखित आग्रह गरेको छ । सो अनलाइनले मंगलबार विभिन्न शीर्षक राखी भिडियोसहित समाचार सम्प्रेषण गरेको काउन्सिलको भनाई छ । काउन्सिलले दिएको जानकारीअनुसार सो अनलाइनले ‘भरतपुरमा छोरी रेणुलाई मेयर नदिए खतराको घण्टी बजाईदिने प्रचण्डको चेतावनी’ शीर्षकमा समाचार सम्प्रेषण गरेको थियो । त्यस्तै, सोही दिन सो अनलाइनले ‘दश सिट नजित्ने माओवादीले धेरै निहुँ नखोज्न देउवाको प्रचण्डलाई चेतावनी’ शीर्षकको समाचार सम्प्रेषण गरेको थियो । काउन्सिलका अनुगमन अधिकृत मल्लकाअनुसार सो अनलाइनले सोही दिन अर्को समाचार ‘कमल थापा रुँदै एमालेको शरण लिन पुगे’ भिडियो समाचार सम्प्रेषण गरेको थियो । समाचारको विषयवस्तु निर्वाचन विरोधी र आचारसंहिता प्रतिकुल रहेकाले त्यसलाई नेपालभित्र सम्प्रेषण हुन नसक्नेगरी व्यवस्था गर्न प्राधिकरणसँग काउन्सिलले लिखित आग्रह गरेको छ । सोहीअनुसार काउन्सिलले मंगलबार नै यो हो टेलिभिजनलाई पनि आचारसंहिता पालनामा लिखित पत्रमार्फत सजग गराएको छ । सो टेलिभिजनले ‘प्रचण्ड विषालु सर्प हुन् उनको दाँत कसरी झार्नु पर्छ भन्ने मलाई थाहा छ ः ओली’ शीर्षक दिई टेलिभिजनको सामाजिक सञ्जाल, युट्युव च्यानलमार्फत समाचार सम्प्रेषण गरेको काउन्सिलको भनाई छ । उपप्रशासकीय अधिकृत रामशरण बोहराकाअनुसार सो टेलिभिजनलाई आचारसंहिता प्रतिकुल हुनेगरी कुनै सामाचार सामग्री सम्प्रेषण नगर्न नगराउन सचेत गराइएको छ ।
