.jpg)
गोविन्द शर्मा
बाँके, फागुन २४ गते । नेपालगञ्जस्थित भन्सार कार्यालय अगाडि रातिको समयमा आवागमनमा हुँदैआएको अवरोध हटाउन जिल्ला प्रशासन कार्यालय बाँकेले तयारी अघि बढाएको छ ।
भन्सार कार्यालय अगाडि भारतीय सीमानजिक जमुनाह–नेपालगञ्ज सडकखण्डको बिचभागमा रहेको सुरक्षा ढाटका कारण रात्रिकालीन आवागमनमा अवरोध हुने गरेको जनगुनासोपछि सुरक्षा प्रमुख र भन्सार कार्यालयका प्रमुखसहित स्थलगत अनुगमन गरिएको प्रमुख जिल्ला अधिकारी श्रवणकुमार पोखरेलले जानकारी दिनुभयो ।
प्रमुख जिल्ला अधिकारी पोखरेलले भन्नुभयो, ‘वास्तविकता बुझेर आवश्यक सुधार गर्ने प्रतिबद्धतासहित अनुगमन गरेका छौँ । जिल्लास्थित सुरक्षा कार्यालयका प्रमुख र भन्सार प्रमुखसहितको बैठकले रात्रिकालीन समयमा आवागमन सुचारु गर्न विभिन्न निर्णय गरेको प्रमुख जिल्ला अधिकारी पोखरेलले बताउनुभयो ।
राजमार्गमा रहेका ट्रक, ट्याङ्कर, मालवाहक कुनै पनि साधनलाई भन्सार यार्डमा मात्र पार्किङ हुने प्रबन्ध मिलाउने र रोडमा पार्किङ गर्नेलाई कारबाही गरिने प्रमुख जिल्ला अधिकारी पोखरेलले बताउनुभयो । जमुनाहदेखि भन्सार गेटसम्म जथाभाबी सवारीसाधन पार्किङले आवागमनमा समस्या हुनेगरेको छ ।
यसैगरी भन्सारनाकामा रहेका सुरक्षा ब्यारियरलगायतका अन्य संरचनालाई रङ्गरोगन तथा मर्मत सम्भार गरिने भएको छ । रात्रिकालीन आवागमनमा चेकजाँचमा रहेका कर्मचारी र सुरक्षाकर्मीले नागरिकको व्यवहारिकता बुझेर आवागमनलाई सहज बनाउने तयारी गरिएको जिल्ला प्रशासन कार्यालय बाँकेले जनाएको छ ।
स्थानीय क्षेत्रका नागरिकको रात्रिकालीन आगमनलाई सहज तुल्याउन गरिएको निर्णय केही समयमै पूर्ण कार्यान्वयनमा आउने प्रमुख जिल्ला अधिकारी पोखरेलले बताउनुभयो । हाल राति १० बजेपछि आवागमन बन्द हुने भएपछि भारतका विभिन्न सहरबाट फर्किने नेपालीहरू तीव्र गतिमा भए पनि जमुनाह पुग्नुपर्ने बाध्यताका कारण पटक–पटक सवारी दुर्घटना हुने गरेको भन्दै नेपालगञ्जवासीले रात्रिकालीन आवागमन नियमित गराउन माग गर्दैआएका छन् ।
