.jpg)
राधा नेपाली
सन्धिखर्क, फागुन १७ गते । अर्घाखाँचीमा आँखाको उपचार गर्न आउनेमध्ये अधिकांशलाई मोतीबिन्दुको समस्या देखिएको छ । जिल्ला आँखा अस्पतालका अनुसार दुई दिने आँखाको निःशुल्क मोतीबिन्दु शल्यक्रिया शिविरमा आउने ३५१ जना बिरामीमध्ये एकसय बिरामीको शल्यक्रिया गरिएको छ ।
३५१ जनाको चेकजाँच गर्दा एक सयको शल्यक्रिया गर्नुपरेको नेपाल नेत्रज्योति सङ्घ अर्घाखाँचीका अध्यक्ष दलबहादुर केसीले बताउनुभयो । नेत्रज्योति सङ्घ अर्घाखाँचीको समन्वयमा अर्घाखाँची दिगो विकास केन्द्रले निःशुल्क आँखाको मोतीबिन्दु शल्यक्रिया शिविर सञ्चालन गरेका थियो ।
केन्द्रले तीन वर्षदेखि दृष्टिविहीन र आँखाको अपाङ्गता भएका असहाय गरिबी तथा अशक्त आँखाका बिरामीलाई निःशुल्क सेवा गर्दैआएको छ । सोही सन्दर्भमा शिविर सञ्चालन गरी मोतीबिन्दुका बिरामीलाई शल्यक्रिया गरिएको अध्यक्ष केसीले बताउनुभयो ।
अध्यक्ष केसीले भन्नुभयो, “आर्थिक अभाव र जिल्ला बाहिर उपचार गर्न जान नसक्नेलाई लक्षित गरी शिविर सञ्चालन भएको हो, यसमा निःशुल्क चस्मा र औषधी वितरण पनि गरिएको छ ।”
जाँच गरिएका बिरामीमध्ये अधिकांशमा मोतीबिन्दुको लक्षण, बुढ्यौलीपन, सन्तुलित आहारको कमी र आँखा सुख्खा हुने समस्या देखिएको जिल्ला आँखा अस्पताल अर्घाखाँचीका प्रमुख सागर घिमिरेले बताउनुभयो ।
उहाँअनुसार जीवनशैलीको परिवर्तनसँगै मधुमेह, उच्च रक्तचापको समस्या बढेकाले मोतीबिन्दु हुनेहरूको सङ्ख्या पनि बढेको हो । आँखामा एउटा प्राकृतिक पारदर्शी लेन्स हुन्छ । त्यो लेन्समा कलर परिवर्तन हुँदैआयो, अथवा बाक्लो हुँदै गयो भने आँखाको पारदर्शितामा धमिलोपन आई हेर्ने क्षमतामा कमी आउनुलाई मोतीबिन्दु भनिन्छ ।
