विद्युतीय प्रणालीबाट भत्ता विवरण

रेखीराम राना

तानसेन, पुस २६ गते । सामाजिक सुरक्षा भत्ता विद्युतीय भुक्तानी प्रणाली ‘इएफ्टी’मार्फत वितरण गरिएको छ । जिल्लाको बगनासकाली गाउँपालिकाले चालु आर्थिक वर्षको दोस्रो त्रैमासिकदेखि ‘इएफ्टी’मार्फत सामाजिक सुरक्षा भत्ता वितरण गरिएको हो । 

‘इएफ्टी’ सेवा सुरु भएपछि लाभग्राहीलाई भुक्तानी गर्नुपर्ने रकम सिधै बैङ्क खातामा पठाइएको पञ्जीकरण शाखाका प्रमुख भोजराज भट्टराईले जानकारी दिनुभयो । सम्झौता गरिएको नेपाल बैंकको खातामा सम्बन्धित लाभग्राहीको रकम पठाइएको भट्टराईले बताउनुभयो । यस आर्थिक वर्षको दोस्रो त्रैमासिकमा गाउँपालिकाले तीन हजार १५५ लाभग्राहीलाई जम्मा तीन करोड १२ लाख ६८ हजार बयानब्बे रुपियाँ ‘इएफ्टी प्रणालीमार्फत वितरण गरेको हो । 

दोस्रो त्रैमासिकमा गाउँपालिकामा ज्येष्ठ नागरिक ६८ वर्षमाथि एक हजार ९२० जना, ज्येष्ठ नागरिक दलित १३७, ज्येष्ठ नागरिक एकल २९७ जना छन् । यसैगरी विधवा आर्थिक सहायता ४२४ जना, पूर्ण अपाङ्गतातर्फ ४७, ख वर्ग आर्थिक सहायता १०८ र दलित बालपोषणतर्फ २२२ जना रहेको पालिकाले जनाएको छ । ‘इएफ्टी’मार्फत लाभग्राहीले प्रविधिमैत्री, छिटोछरितो र सहज सेवा पाउने पालिकाका प्रमुख प्रशासकीय अधिकृत बद्रीनाथ लम्सालले जानकारी दिनुभयो ।