उपचाररत तिम्सिनाको अस्पतालबाट उद्धार

राममणि दाहाल

हेटौँडा, पुस २० गते । उपचार खर्च तिर्न नसक्दा अस्पतालमा बस्न बाध्य हुँदै आउनुभएका इलामको माई नगरपालिका–१० लुम्बाकका दुर्गाप्रसाद शर्मा तिम्सिनाको उद्धार गरिएको छ ।

मानव सेवा आश्रमको मुख्य कार्यालय, हेटौँडाले उहाँलाई चितवनको खैरहनीस्थित अस्पतालबाट आज उद्धार गरेको हो । चितवनको खैरहनी नगरपालिका –११ स्थित ब्युटिफुल माइन्ड इन्स्टिच्युट अफ् साइक्याट्रिनमा उपचारका लागि भर्ना हुनुभएको ६४ वर्षीय तिम्सिना उपचारमा भएको खर्च तिर्न नसकेपछि गत ६ महिनादेखि अस्पतालमा नै बस्न बाध्य हुनुभएको थियो ।

मानव सेवा आश्रमले तिम्सिनाको उद्धारसँगै आश्रममा आश्रय र थप उपचार गरिदिने भएको छ । उद्धारपछि तिम्सिना हेटौँडा उपमहानगरपालिका –९ स्थित मानव सेवा आश्रमको मुख्य कार्यालयमा आश्रित रहनुभएको छ ।

यसअघि गोरखापत्रको अनलाइन संस्करणमा बुधबार ‘उपचार गरेको चार लाख तिर्न नसक्दा अस्पतालमै बन्धक छन् दुर्गाप्रसाद’ शीर्षकमा समाचार प्रकाशित भएको थियो । 

आश्रमका सूचना प्रविधि अधिकारी नीरज पटेलले आश्रयका केन्द्रीय अध्यक्ष रामजी अधिकारीको पहलमा तिम्सिनाको उद्धार गरिएको जानकारी दिनुभयो । अस्पतालमा उपचार गर्दाको रकम तिर्न नसक्दा अस्पतालमै बस्न बाध्य हुनुभएको हामीलाई सञ्चारमाध्यमबाट जानकारी पाएपछि अस्पताल प्रशासनसँग अस्पताललाई तिर्नुपर्ने शुल्कलगायतका खर्च तिर्नु नपर्ने सहमति गरी उद्धार गरिएको आश्रमका सूचना प्रविधि अधिकारी पटेलले बताउनुभयो ।  

तिम्सिनाले भारतीय जेलमा लामो समय बिताउनु भएको थियो ।  २०७७ सालमा स्वदेश फर्काइएका उहाँलाई गत वर्ष उक्त अस्पतालमा उपचारका लागि भर्ना गरिएको थियो । ६ महिनाअघि नै उहाँको स्वास्थ्यमा सुधार आएको चिकित्सकले बताए पनि उपचार खर्च अस्पताललाई भुक्तानी गर्न नसक्दा घर ल्याउन नसकेको परिवारका सदस्यले बताउँदै आउनुभएको थियो । 

दुर्गाप्रसादका भतिजा गोपाल तिम्सिनाले उपचारका क्रममा अस्पतालमा ६ महिनाअघि नै सात लाख १५ हजार रुपियाँ खर्च भएकोमा तीन लाख रुपियाँ बुझाए पनि बाँकी चार लाख १५ हजार रुपियाँ नहुँदा ठुलोबुबा अस्पतालमै बस्नुपरेको बताउनुभएको थियो । तिम्सिनालाई भारतको उच्च अदालतको आदेशअनुसार दिइएको रकम पनि यसअघि नै उपचारमा खर्च भइसकेकाले परिवारका सदस्य थप उपचार खर्च भुक्तानीका लागि जुटाउन समस्यामा परेको थियो ।

ब्युटिफुल माइन्ड इन्स्टिच्युट अफ् साइक्याट्रिनका अध्यक्ष डा. गिरिराज भन्टानाले दुर्गाप्रसादको स्वास्थ्यमा सुधार आइसकेको भन्दै शतप्रतिशत निको भने नभएको बताउनुभयो । तिम्सिनाको अहिलेको अवस्था सामान्य रहेको बताउँदै आश्रमले थप उपचारमा सहयोग, समन्वय र सहजीकरण गर्ने सूचना प्रविधि अधिकारी पटेलले बताउनुभयो ।  

दुर्गाप्रसाद जेलबाट छुटेर आएपछि उहाँमा मानसिक समस्या देखिएकाले विराटनगरमा समेत १७ दिन उपचार गरिएको थियो । उहाँ २० वर्ष उमेर हुँदा २०३७ साल माघमा घर छाडी बेपत्ता हुनुभएको थियो । घर छाडेकै वर्ष भारत दार्जिलिङमा एक महिलाको हत्या अभियोगमा उहाँ जेल पर्नुभएको थियो । 

तिम्सिनालाई २०७७ साल फागुनमा भारतकै कोलकातास्थित दमदम कारागारमा  भेटिएपछि विभिन्न सङ्घ संस्थाको पहलमा २०७७ साल चैत ८ गते इलामको लुम्बाकस्थित घर ल्याइएको थियो ।