ठाकुरप्रसाद आचार्य
बागलुङ, पुस ११ गते । राष्ट्रपति रामचन्द्र पौडेलले प्रसिद्ध धार्मिक स्थल बागलुङ कालिका भगवती मन्दिरको दर्शन र पूजा आराधना गर्नुभएको छ ।
आजदेखि सुरु हुने सातौं बागलुङ महोत्सवको उद्घाटन गर्न बुधबार बिहान बागलुङ बजारमा आउनुभएका राष्ट्रपति पौडेलले प्रसिद्ध शक्तिपीठका रुपमा परिचित बागलुङ कालिका भगवती मन्दिरमा पुगेर दर्शन र पूजा गर्नुभएको हो ।
दर्शनका लागि मन्दिरमा पुग्नुभएका राष्ट्रपति पौडेललाई कालिका भगवती गुठी व्यवस्थापन समितिका अध्यक्ष कुमार खड्कालगायतका पदाधिकारीहरुले स्वागत गर्नुभएको थियो ।
पूजा आराधनापछि कालिका भगवती गुठी व्यवस्थापन समितिले सम्मान पत्र हस्तान्तरण गरेको थियो । साथै अध्यक्ष खड्काले काठबाट बनाइएको कालिका मन्दिरको मूर्ति उपहार दिनुभयो ।
राष्ट्रपति पौडेलले मन्दिरमा राखिएको आगन्तुक पुस्तिकामा सुझावसहित हस्ताक्षर गर्नुभयो । राष्ट्रपतिबाट मन्दिरको दर्शन र पूजाआराधनाले बागलुङ कालिका भगवतीको प्रचारप्रसारमा टेवा पुग्नुका साथै धार्मिक पर्यटन प्रवर्द्धनमा महत्त्वपूर्ण योगदान पुग्ने गुठी व्यवस्थापन समितिका अध्यक्ष खड्काले बताउनुभयो ।
-original-thumb.jpg)
