चार सय सुत्केरीलाई अत्याधुनिक टेन्ट

सहदेव बस्नेत
जाजरकोट, पुस ८ गते । सेभ द चिल्ड्रेनले नलगाड र रुकुम पश्चिमको आठविसकोट नगरपालिकामा भूकम्पपीडित सुत्केरीलाई चार सय टेन्ट उपलब्ध गराएको छ । सेभ द चिल्ड्रेनसँगको साझेदारीमा पाँचतारा युवा संरक्षक मञ्च जाजरकोटले सम्बन्धित पालिका र जिल्ला विपद् व्यवस्थापन समितिको समन्वयमा न्यानो ओछ्यान र चुलो समेत जडान गरिएको टेन्ट वितरण गरिएको हो ।

पाँचतारा युवा संरक्षक मञ्च जाजरकोट अध्यक्ष छवी पन्तले नलगाड नगरपालिकाका विभिन्न वडामा २ सय ५० परिवारलाई विशेष प्रकारको टेन्ट वितरण गरिएको जानकारी दिनु भयो । पन्तका अनुसार दुई वर्षमुनीका बच्चा भएका महिला र ५ महिनाभन्दा माथिका गर्भवति महिला, क र ख वर्गका अपाङ्कता भएका व्यक्तिहरु छनौटमा परेका छन् । ओछ्याउनलाई विन्टराईजेसन किट भएको टेन्टमा धुवा रहित आधुनिक चुलो जडान गरिएका पन्तको भनाइ छ ।

नेपाल सरकारले भन्सार छुट गरेका टेन्टमा पार्टीसन गरेर चार वटासम्म कोठा बनाएर प्रयोग गर्न सकिने बनाइएको छ । भूकम्प लगाएतका विभिन्न विपदहरुमा सबैभन्दा बढि जोखिममा सुत्केरी, गर्भवति महिला र अपाङ्कता भएका व्यक्तिहरु रहने भएको हुँदा जोखिम न्यूनीकरण गर्न उक्त टेन्ट वितरण गरिएको अध्यक्ष पन्तले बताउनु भयो ।