जाजरकोटमा चिसोले दुई जनाको मृत्यु

सहदेव बस्नेत 

जाजरकोट, मङ्सिर १ गते । चिसोका कारण जाजरकोटमा दुई जना वृद्धको मृत्यु भएको छ । भूकम्पले घरमा क्षति पुगेपछि त्रिपालमा बस्दै आएका भेरी नगरपालिका २ का ८८ वर्षीय धुलेश्वर कार्की र बारेकोट गाँउपालिका ४ जिरीका नरेन्द्रबहादुर सिंहको मृत्यु भएको हो ।

कार्की र सिंह दुवै दमका दीर्घरोगी भएको र चिसोका कारण रोगले च्याप्दा दुवैको ज्यान गएको स्थानीयले बताएका छन् । भूकम्पपछि घर बस्न नमिल्ने भएपछि जाजरकोटका ३४ हजारभन्दा बढी परिवार घरवार त्रिपालमुनि बस्दै आएका छन् ।

त्रिपालमुनिको बसाइले बालबालिका, सुत्केरी, दीर्घरोगी र वृद्धवृद्धा बढी प्रभावित भएका छन् । बालबालिका र वृद्धवृद्धामा श्वासप्रश्वाससम्बन्धी समस्या देखिन थालेको छ । यसअघि गत साता नलगाड ४ मा चिसोका कारण दुई जना दीर्घरोगीको ज्यान गएको थियो ।

जाजरकोटका प्रमुख जिल्ला अधिकारी सुरेश सुनारले चिसोले बालबालिका, सुत्केरी, दीर्घरोगी र वृद्धवृद्धालाई असर पारेको र त्यसको आवश्यक व्यवस्थापनका लागि पहल भइरहेको बताउनुभयो ।